گود سبور//

أكدت العصبة الوطنية لكرة القدم الاحترافية، الخبر اللي نشرو جورنال “گود” فوقت سابق بخصوص فشل محاولات رفع عدد اندية البطولة من 16 لـ20، وهي المحاولات اللي كان وراها الوزير مهدي بنسعيد وفرقة حومتو يعقوب المنصور واولمبيك اسفي.

وأعلنت العصبة الوطنية لكرة القدم الاحترافية فبلاغ لها، ليلة الخميس الجمعة، ان منافسات البطولة للموسم الرياضي 2026-2027 غادي تلعب بالصيغة المعتمدة بمشاركة 16 فرقة فالقسم الاول و 16 فرقة فالقسم الثاني، وان القرعة غادي تكون الجمعة 28 غشت 2028.

وتدارت محاولات مؤخرا من خلال مقترح تقدمو به المدربين المشومرين لرفع عدد اندية البطولة الاحترافية إلى 20 فرقة باش يلقاو فين يخدمو زعمة حيث المدربين البرتغاليين اكتسحوهم، وهما والمدربين والتوانسة فالسنوات الأخيرة، وبعدما صوتو عليه 17 فرقة وعارضوه 7 اندية و 3 اندية امتنعت على التصويت فاجتماع ما بينها وبين العصبة الوطنية الاحترافية لكرة القدم غاب عليه فريق نهضة بركان، وكانت مصادر جورنال “گود” كشفت فوقت سابق، ان هذا هذا المقترح ما غاديش يتقبل من عند الجامعة الملكية المغربية لكرة القدم برئاسة فوزي لقجع، والاتجاه غادي نحو رفض هذا الشي، وانه يبقى عدد الاندية فالقسم الاول والثاني الموسم الجاي بـ16 فرقة، وهذا الشي اللي وقع وتأكد من خلال بلاغ العصبة الاحترافية.

وللإشارة فهذا المقترح دعموه جوج فراقي بشكل قوي هما يعقوب المنصور فرقة الوزير مهدي بنسعيد واولمبيك اسفي اللي طاحو للقسم الثاني الموسم الماضي بالكورة، وكان ضغط كبير على رؤساء الاندية الاخرى باش يساندوه، وسط معارضة كبيرة من جماهير الفرق الوطنية، وجدل قانوني كبير اضافة لصورة ونزاهة الكورة المغربية اللي ولات على المحك بسبب هذا المقترح اللي كانو باغيين هاد الناس يطبقوه، وارتباط هذا الشي بتسييس كرة القدم، والدفع بهذا الملف مع قرب الانتخابات التشريعية، وعلاقتو بحزب الأصالة المعاصرة اللي من بين المنتسبين له الوزير مهدي بنسعيد رئيس يعقوب المنصور فريق الحومة فالرباط اللي طلع مرة وحدة فتاريخو للقسم الاول وضرب فيه عام واحد وخلق البلبلة وجدل كبير بهاد الملف.

وبالإضافة لهذا الشي راه ماشي من المعقول والمنطقي رفع عدد اندية البطولة إلى 20 فرقة حاليا، حيث الموسم الجديد ما بقى له والو، والمصيبة ان العصبة الاحترافية مازال ما علنت على موعد الانطلاقة ديالو ولا على البرمجة، وخاص المنافسات تسالي فماي 2027 حيث الصيف الجاي كاين كأس افريقيا، زائد ان البطولة الاحترافية كاتعاني سنوات هادي غير مع البرمجة وبـ16 فرقة، بقى غير إلى تزادو عليهم 4 فرق اخرين وغير الموسم الماضي راه ما سالا حتى يوليوز بسبب تأجيل الماتشات الكثير، وتدخلت الجامعة الملكية المغربية لكرة القدم عند الفيفا باش تكمل البطولة واخا بدا المونديال.