باريس كود////

اليوم كان نهار عامر عند الوزير الاول الفرنسي فرانسوا بايرو فالمعرض الدولي للفلاحة بباريس. بداه مع الثمنية دالصباح فلقاءات مع نقابات الفلاحة الفرنسية. تبعو لقاءات كثيرة فالاجنحة مع كاع مكونات القطاع الفلاحي الفرنسي٬ واخا هاد الشي حرص يزور الرواق المغربي ضيف هاد الدورة.

بايرو اللي عبر للمسؤولين لمغاربة اللي تلاقاهم هاد ليام بباريس على حبو لكبير للملكة٬ ما كانش مبرمج هاد الزيارة قبل.

باش جا حتافلو بيه لمغاربة بزاف. بالموسيقى بالكرم المغربي. كان معاه هاد الزيارة وزيرة الفلاحة والسيادة الغذائية والغابات الفرنسية، آني جينيفارد. طول بزاف فرواقنا.

كان فاستقبالو وزير الفلاحة والصيد البحري والتنمية القروية والمياه والغابات، أحمد البواري.

شرح ليه المنتجات للي كتسمى المجالية ديالنا وخدمة التعاونيات. حتى العارضين والعارضات شرحو للوزير الاول الفرنسي

طبعا الزيارة سياسية بالاساس. فهاد الوقت باريس كيزيد تشدد علي قوة العلاقات مع الرباط وفيها رسالة لكابرانات الجزائر. فالوقت اللي العلاقات الجزائرية الفرنسية غادية وتكفص بعد الهجوم الارهابي اللي دارو جزائري حراگ بمولوز. هاد السيد رفضات بلادو ف10 المرات طلب باريس باش تعطيه ليسي باسي باش يرجع لبلادو

الوزير الاول الفرنسي خدا تذكار على خدمة التعاونيات. فيه قرعة زيت العود واخرى زيت اركان والزغفران ومنتجات اخرى ديال بلادنا