كود الرباط//

قال عبد اللطيف وهبي، وزير العدل، بلي “مبقا حتى حد محمي فهاد البلاد بسباب الهجوم للي كيتعرضو ليه الناس فوسائل التواصل الاجتماعي خصوصا فالفايسبوك”.

وهبي، كيهضر على ظاهرة المعيور فالسوشل ميديا، أثناء جوابه على مداخلات البرلمانيين بلجنة العدل والتشريع بمجلس المستشارين، فمناقشة الميزانية الفرعية لوزارة العدل، قال بلي “أخطر ما يهدد القضاء هو الفايسبوك..”، مشيرا بلي حتى القاضي لي كيصدر الأحكام مخلاوهش فالفايسبوك واليوتيب.

وشدد وهبي: “خاص نوقفو هادشي.. وديك المرة شفت واحد خرج كيعاير مرتو بطريقة مشينة.. خاص نوقفو هادشي”.

وتابع وهبي: “الخطير هو استعمال الذكاء الاصطناعي وتزوير صوتي..”.

وتكلم وزير العدل على إدانة المسؤولين والسياسيين قبل ما يقول القضاء كلمتو، ناسين بلي كاين محاسبة ونيابة عامة وقضاء.

وهبي قال بلي رئيس منظمة دولية لحقوق الإنسان خبرو بلي مبقاوش كياخدو معلومات من الفايسبوك واليوتيب حول المغرب.

وهبي كلاشا شي يوتوبر وقال بلي كيهضر على حقوق الإنسان وهو خارج من الحبس بتهم النصب والاحتيال.