وكالات //

الممثل السوري الشهير يحيى بيازي دار البوز في السوشيل ميديا بعدما تنتشر فيديو ديالو كيهضر مع الممثل وائل شرف على تفاصيل المرض لي جاه، وهادشي لي خلا الناس بزاف تتعاطف معاه.

الفنان السوري لي تعرف بدور خاطر في باب الحارة قال أن جاه الشلل تسبب ليه في مشكل في النطق وبزاف ديال الفنانين كانو عارفين الأزمة الصحية لي كيعيش وحتى واحد ما اتصل بيه من غير وائل شرف لي كان معاه في باب الحارة ولعب دور معتز.

ومن بعد ما انتشر الفيديو بزاف ديال النجوم نشرو التعاطف ديالهم مع يحيى البيازي، منهم أمل عرفة لي قالت ليه ما كنتش عارفاك مريض حتى شفت الفيديو، وتمنات ليه الشفاء العاجل.

الفنانة سلاف فواخرجي حتى هي نشرات تصويرتو على حسابها في الأنستكَرام وكتبات عليها باللهجة السورية: “سلامتك أبو أوس الغالي.. الله يكون معك، وعم ندعيلك وكلنا جنبك وناطرينك.. يحيى بيازي”.

وقالت وسائل إعلام سورية أن يحيى جاه مرض “التصلب اللويحي” في الوقت لي قالت فيه صفحات فيسبوك أن الفنان السوري جاه الشلل النصفي وأثر ليه على النطق.

https://www.facebook.com/photo.php?fbid=887720805732018&set=a.108199763684130&type=3

https://www.instagram.com/p/CktfMIWhnld/?utm_source=ig_embed&ig_rid=6a7195bc-6527-4bb0-afd4-b6557697422b