كود الرباط//

قال محمد سعد برادة، وزير التربية الوطنية والتعليم الأولي والرياضة، بلي كيستعد باش يدير قرار بخصوص تسقيف سن ولوج مباريات الأساتذة، وللي غاتكون قريبة وللي فيها 20 ألف منصب.

برادة، فجواب على أسئلة ومداخلات نواب من الأغلبية والمعارضة، فجلسة عمومية بمجلس النواب اليوم، كشف بلي فالكونكور العام لي فات وفيه 14 ألف منصب وتقدم ليه 120 ألف متباري، اغلب الناجحين عمرهم قل من 25 سنة، بنسبة 80 في المائة.

اما لي عندهم 29 عام فراه نجحو فقط 4 فالمائة، كما أن 75 في المائة من الناجحين عندهم ميزة فشهادة البكالوريا أو في الإجازة.

وهاد القرار ديال التسقيف سن ولوج مباريات التعليم لأقل من 30 سنة، وفق الوزير، معجبش ممثلي التعليم الخاص، وللي دارو شكاوى وكيتشكاو من هروب الاساتذة ديالهم للتعليم العمومي.

البريفي كيطالبو يدار امتحان ديال التعليم العمومي يدار بكري، حسب الوزير برادة، حيث فاش كيخرج الكونكور ديال العمومي كيمشيو ليهم الاساتذة لي عندهم تجربة فالبريفي ويجتازو مباريات فالعمومي وكيتفوقو وكيخليو الاقسام ديال البريفي خاويا.

دبا الوزير علن كاينا دراسة باش يتم مراجعة تسقيف سن التوظيف فالتعليم. واخا الوزير كشف بلي معندوش حتى تأثير على النتائج خصوصا وان الاغلبية لي كينجحو ف عمر اقل من 25 سنة.