كود -وكالات//

كشفات مصادر لصحيفة نيويورك بوست أن الرئيس الأمريكي دونالد ترامب تفاجأ بزاف فواحد الإحاطة الاستخباراتية لي عطاتو  أجهزة الاستخبارات الأمريكية، واللي فيها معطيات كتقول بأن المرشد الأعلى الجديد ديال إيران، مجتبى خامنئي، ممكن يكون مثلي جنسي ، المصادر قالت أن ترامب ما قدرش يحبس الضحك ديالو ملي سمع هاد المعلومة، وحتى بعض الناس لي كانوا حاضرين ضحكوا حيث اعتبرو الخبر صادم وغريب لزعيم دولة إسلامية .
.
ووفق نفس المصادر وكالات الاستخبارات الأمريكية كتشوف هاد المعطيات عندها نوع من المصداقية، وماشي غير إشاعة سياسية باش يضربو بها صورة مجتبى خامنئي، اللي تزاد سنة 1970 تقريباً وتم اختيارو باش يخلف والدو علي خامنئي بعد وفاتو، التقارير كتقول حتى أن باه كان عندو شكوك قديمة بخصوص الحياة الشخصية ديال ولدو وكان خايف هاد الشي يقدر يأثر على قدرتو باش يحكم  الجمهورية الإسلامية.

بعض المعلومات اللي وصلات للاستخبارات كتقول أن مجتبى كان عندو علاقة قديمة وطويلة مع واحد الأستاذ ديالو فالصغر، وأن هاد الموضوع كان كيتداول فالسر داخل إيران لسنين، وكتزيد المصادر أن الاستخبارات ما عندهاش أدلة مصورة، ولكن المعلومة جاية من مصدر مصنف من بين أكثر المصادر حساسية وحماية داخل الحكومة الأمريكية.

المقال كيشير حتى لتقارير قديمة تسربات ف 2008 من ويكيليكس، واللي كانت كتقول أن مجتبى خامنئي تعالج فـ لندن من مشاكل جنسية وتعطل فالزواج كيفما سبق نشرات گود  ،فإيران المثلية الجنسية مجرمة بالقانون وتقدر توصل العقوبة حتى للإعدام، وهاد الشي كيخلي الموضوع حساس بزاف سياسياً واجتماعياً.