كود -variety//
الممثلة الأسترالية” نيكول كيدمان“ رجعات هضرات على واحد المرحلة مهمة فحياتها عاشتها فالمغرب مع ولادها، فحوار دارتو مع مجلة أمريكية.
”كيدمان“ اللي عندها دابا 58 عام، مازال كتعتبر من أبرز نجمات هوليوود وكتخدم على بزاف ديال المشاريع فالتلفزة والسينما, من بينها مسلسل جديد على منصة برايم فيديو سميتو “سكاربيتا”، وزيد عليها فيلم “براكتكال ماجيك 2” اللي غادي يجمعها مرة أخرى مع الممثلة ساندرا بولوك.
وفنفس الحوار هضرات حتى على حبها للسفر واكتشاف العالم، وقالت باللي زارت بزاف ديال البلايص بحال القارة القطبية الجنوبية، وغادي تمشي حتى لجزر غالاباغوس، ومن بعد غا دير رحلة على رجليها حتى لمدينة ماتشو بيتشو.
ومن بين الذكريات اللي بقات عزيزة عليها، التجربة ديالها فالمغرب مني قالت باللي مشات قريب للحدود ديال الجزائر مع المخرج فيرنر هيرزوغ ودارت دورة فوق الجمال ،ووضحات باللي بناتها كان عندهم الزهر يعشيو فالمغرب ويكتاشفو ثقافات مختلفة و النكهات والروائح واللغات وحتى الأفكار.
”كيدمان“ عاشت فالمغرب شهرين فـ2014 مني كان تصوير فيلم “كوين أوف ذا ديزيرت”، اللي تصور فعدة مدن مغربية بحال ورزازات ومرزوكة وأرفود ومراكش وآيت بن حدو، فهاد الفيلم كانت كتجسد شخصية غيرترود بيل، وهي كاتبة ومحللة سياسية بريطانية.
وقالت تاني باللي فالبداية تلفات شوية ملي وصلات للمغرب، ولكن مع الوقت ولات كتدور فالسويقات وكتساوم فالسوق، واعتبرت هاد التجربة مهمة بزاف لولادها باش يتعرفو على ثقافات مختلفة ويعيشو تجارب جديدة فالعالم.
موضوعات أخرى
جداتنا لي كانت مدفونة فالصخيرات قبل 6400 عام بان وجهها وها اصلها (فيديو)
تركيا قتلات 3 د المْسلحين حاولو يهجمو على السفارة الاسرائيلية فإسطنبول (فيديو)
