كود- كازا //

المغرب زير الصمطة على قرصنة الأفلام والماتشات والقنوات الرقمية مني دخل قانون جديد رقم 013.26 حيز التنفيذ نهار 10 غشت 2026، والهدف ديالو هو يحبس البث اللي بلا رخصة ويحمي حقوق المؤلفين والقنوات اللي كتخسر فلوسها على المحتوى.
هاد القانون وسع المفهوم ديال البث باش يدخل فيه الإنترنت والشبكات الإلكترونية ،وزاد لأول مرة تعريف للقرصنة، لي قال عليها انها أي استعمال لمحتوى محمّي بلا إذن مولاه ، سواء  بطرق قديمة ولا بتطبيقات وسيرفرات رقمية حديثة، وهادشي كيعني باللي الـ IPTV ولى دابا ممنوع قانونياً وخارج على القانون واخا ما مذكورش بالسمية.

من جيهة أخرى، ولى عند القضاء الحق باش يخرج أوامر لشركات الإنترنت والاستضافة باش يقطعو البث ويحجبو السيرفرات المقرصنة، هادشي كيمشي بمسطرة قانونية ماشي حجب عشوائي.

أما العقوبات فغادي تولي قاصحة بزاف، حيت كتوصل فالمخالفة الأولى للحبس من شهرين لـ 6 شهور وغرامة حتى لـ 100 ألف درهم، وإيلا تعاودات كتوصل العقوبة لـ 4 سنين ديال الحبس وغرامة تقيلة ديال 600 ألف درهم.