كود – وكالات //

حطّات السلطات فالجزائر مغنية الراي وردة سماتي، لي معروفة بـ”شارلومنتي”، فالحبس المؤقت، من بعد ما تحرّك وكيل الملك فمحكمة العثمانية فولاية وهران ملف ضدها، وهاد الشي جا من بعد متابعة من طرف وزارة الشؤون الدينية والأوقاف بسبب محتوى الفيديوهات ديالها وتصريحات قالت الوزارة باللي “ما كيتوافقوش مع القيم والأخلاق العامة”.

وجا هاد الاعتقال من بعد الحيحة الكبيرة لي دارتها المغنية هادي أسابيع، ملي علنات الانفصال ديالها على راجلها السابق، و خرجات بأغنية هاجماتو فيها قبل ما ضربها بتزويجة جديدة  بلا ما تسالي مدة العدة الشرعية حسب التقاليد الإسلامية ، وزادت نقلات العرس ديالها لايف فالإنترنت، وخبّات وجه راجلها بماسك.

ودابا “شارلومنتي” كتواجه تهم ديال الإخلال بالآداب العامة والمسّ بالقيم الدينية، فملف دارتو وزارة الشؤون الدينية وقدّماتو للقضاء.

أما التهم لي توجهات لوردة هي  بالمساس بالدين و تحريض العيالات يتزوجو بلا ما يكملو “العدة” الشرعية، و نشر محتوى هابط من خلال فيديوهات ومنشورات اعتابرها القضاء مسيئة وكتخدش الحياء العام، وفنفس الوقت كاين اتهام بالاستغلال الخايب للمنصات الرقمية  و نشر محتويات اللي تصنّفات كغير قانونية.