الرئيسية > آش واقع > تزامنا مع محاكمتهم اليوم.. ها كيفاش دازت الوقفة مع الريسوني والراضي قدام محكمة الاستئناف فكازا – تصاور
18/05/2021 14:10 آش واقع

تزامنا مع محاكمتهم اليوم.. ها كيفاش دازت الوقفة مع الريسوني والراضي قدام محكمة الاستئناف فكازا – تصاور

تزامنا مع محاكمتهم اليوم.. ها كيفاش دازت  الوقفة مع الريسوني والراضي قدام محكمة الاستئناف فكازا – تصاور

كود كازا//

خاضو كل من عائلتي الصحافيين المعتقليين، عمر الراضي وسليمان الريسوني، إلى جانب حقوقيين وفاعلين مدنيين، وقفة احتجاجية، اليوم الثلاثاء، قدام استئنافية كازا، تزامنا مع جلسة محاكمتهما.

الوقفة، اللي دعات ليها اللجنة المحلية فكازا من أجل حرية عمر الراضي وكافة معتقلي الرأي، وهيئة مساندة الريسوني والراضي ومنجب، جاو ليها العشرات، دعاو من خلالها بإطلاق سراح الصحفيين، كيف رفعو شعارات كينددو بيها ب”استهداف الصحافيين وحرية التعبير فالمغرب”.


وهذ الوقفة جات، بعدما وصل الريسوني لليوم 41 للإضراب عن طعام، وتدهورات حالتو الصحية، وكذلك بعد تدهور الحالة الصحية للراضي، المصاب بداء الكرون، واللي كان خاض إضراب عن الطعام لمدة 22 يوم.

وكانو عائلات الصحفيين بجوج دايرين، بشكل يومي هذي سيمانة، اعتصام قدام سجن عين السبع 1 “عكاشة”، فين مشدودين.

اليوم تأخرات جلسات كل من الراضي والريسوني لفاتح يونيو 3 من نفس الشهر على التوالي، بحكم ان الحالة الصحية ديالهم ماكتسمحش ليهم بتتبع مجريات محاكمتهم، اللي وصلات لمرحلة المناقشة.

ومتابع عمر الراضي بتهم “تلقي اموال من جهات أجنبية بغاية المساس بسلامة الدولة الداخلية”، بالإضافة لتهمة “هتك العرض”، بينما متابع الريسوني بتهم “هتك العرض بالعنف” و”الاحتجاز”، وهي التهم اللي كينفيوها الصحفيين وكيعتبروها “ملفقة”.

موضوعات أخرى