كود -وكالات//

واحد الجروب في الفيسبوك سميتو “شكاوى أهالي قاع الهامور” طلع تراند فمصر،الفكرة ديالو عادية مني  شدو مدينة خيالية ديال الرسوم  “سبونج بوب” ورجعوها بحال شي حومة شعبية حقيقية كتعاني من نفس المشاكل اللي كنعيشوها في الواقع، وهاد الجروب جمع كتر من مليون ونص ديال الأعضاء في أيام قليلة.

الناس تما مابقاوش كيهضرو على مغامرات ديال سبونج بوب وإنما ولقاوها سبة فين يفرغو  مشاكلهم اليومية بطريقة ديال الضحك، كتلقى بنادم حاط ريفيو كيتشكى من الغلا ديال “سلطع برجر” والمعاملة الخايبة ديال شفيق ، وواحد آخر كاتب شكوى للمجلس البلدي حيث عندو مشكل ديال الما، عاد إعلانات الكراء الساخرة بحال شي حد باغي يكري بيت فوق دار سبونج بوب.

التريند كبر بزاف لدرجة أن الفنانين والمشاهير حتى هما دخلو يشاركو بحال الفنان باسم سمرة اللي حط صورته وكتب “بقينا في القاع” وحتى هنا الزاهد اللي علقات بـ “الهجرة إلى قاع الهامور”، وكلشي ولى باغي يرجع كائن بحري غير باش يهرب من واقعو بالضحك والنشاط.

السوسيولوجيا كتقول لينا باللي فاش كيكثر الضغط الاقتصادي والاجتماعي في الواقع (بحال غلاء المعيشة والمشاكل اليومية)، المجتمع كيبحث أوتوماتيكياً على “ميكانيزمات دفاعية” باش يحمي راسو من الإحباط,”قاع الهامور” ولى هو هاد الملجأ والجروب السحري فين كيهرب الإنسان المصري باش يخفف على راسو.

عاد أن الشباب المصري لقا ف”قاع الهامور” متنفس ذكي، عوض ما يهضر على المشاكل الحقيقية ويتعرض للمساءلة أو القمع، كيسقط نفس هاد المشاكل ) على شخصيات كرتونية بحال “مستر سلطع” أو “شفيق”.

هاد الكودينغ هو وسيلة دفاعية للمجتمع باش يعبر على كاع داكشي اللي حابس لداخل بلا ما يتخطى الخطوط الحمراء للرقابة.