كود أكادير//

ترونات ديال بصح فحسنية أكادير بعد البداية الخايبة فالبطولة هاد العام واخا تدار شونجمو كبير فالفرقة، وتخسرات فلوس صحيحة باش الغزالة تلعب على البطولة.

المدرب البرازيلي باكيتا علن على الاستقالة ديالو من تدريب حسنية أكادير مباشرة بعد ماتش الماص لي سالا بالتعادل وللي خلى الحسنية فالمركز 12 بـ14 نقطة بعد الجولة 14 أي أن الفرقة جابت غير نقطة فكل ماتش لعباتو هادشي لي خلا الجمهور يكعى ويطالب باستقالة الرئيس الحبيب سيدينو والنائب ديالو أمين ضور، حيت علنات إلتراس إيمازيغن على مقاطعة ماتشات الحسنية حتى تحقق المطالب ديالها والحيوط ديال المدينة عمرو بكتابات “سيدينو وضور ارحل” الخ..

الإدارة الحالية ديال الحسنية لي توفرات ليها جميع الظروف ماقدراتش ترجع الفرقة لبلاصتها وتنافس على الألقاب بعد سنوات من خسارة نصف نهائي كأس الكاف ونهاية كأس العرش فالنهائي المعروف قدام الطاس فوجدة.

مصادر كود قالت إن عدد من المدعمين ديال الفرقة كاعيين حتى هوما على لحالة لي وصلات ليها الحسنية ويقدر يتدار اجتماع مع الإدارة ديال الغزالة الأيام الجايا يتحسم فيه بقاء المكتب الحالي من عدمه.