كود – وكالات//

فواحد العملية كبيرة دالأمن، السلطات المكسيكية علنات على مقتل نيميسيو روبين أوسيغيرا سيرفانتيس، المعروف بلقب “إل منشو”، اللي كان زعيم كارتل خاليسكو الجديد للجيل (CJNG)، فعملية عسكرية دارتها القوات المسلحة المكسيكية اليوم الأحد فبلدة تاپالپا فولاية خاليسكو. هاد الحدث كيتعتبر واحد من أكبر النجاحات فمحاربة الجريمة المنظمة فالمكسيك، ولكن فنفس الوقت خلق موجة ديال العنف الانتقامي اللي خلات بزاف ديال المدن ففوضى، حتى تعطلو مطارات وطرق رئيسية، وتحرقو طموبيلات، وإطلاق النار عشوائياً.

واحد المسؤول الفيدرالي المكسيكي مجهول، قال باللي العملية العسكرية اللي قتلت “إل منشو” وقعات فواحد المنطقة جبلية بعيدة فخاليسكو، فين كان الزعيم مخبي، القوات المسلحة، بمساعدة وزارة الدفاع الوطني  (Sedena)، هاجموه على غفلة وقتلوه هو ولي معاه. ما ،“إل منشو”، اللي تزاد ف1966 فولاية ميتشواكان، أسس كارتل خاليسكو الجديد ف2010 من بعد ما انفصل على كارتل آخر، ودغيا تحول لواحد من أقوى المنظمات الإجرامية فالمكسيك والعالم.

باش ينتقمو من مقتل زعيمهم، أعضاء الكارتل هاجمو دغيا بزاف ديال الولايات، بحال خاليسكو، ميتشواكان، كوليما، وغويريرو، الهجمات شملات براجات أمنية، لوتورتات، وبنيايت عمومية والمطارات..

السلطات نصحات السكان يبقاو فديورهم وما يخرجوش إلا عند الضرورة، وزارة الدفاع الوطني قالت باللي العمليات الأمنية باقا باش تسترجع السيطرة على الطرق والمطارات، ونشرو آلاف الجنود فالمناطق الساخنة.

مريكا عبرات على ترحيبها بالعملية واعتبراتها خطوة مهمة فمحاربة تهريب المخدرات اللي كيهدد الأمن ديالها، ولكن خبراء الأمن حذرو باللي مقتل “إل منشو” ممكن يخلق فراغ قيادي فالكارتل ويزيد العنف .

موت “إل منشو”، اللي فلت من محاولات اعتقال سابقة، كيشكل تحول تاريخي فالحرب على المخدرات، كندا ومريكان حبسو الرحلات الجوية للمكسيك وحذرو مواطنيهم انهم مايمشيو لتما فهاد الوقت .