كود الرباط//

ترونات اليوم فالجلسة الاسبوعية ديال مجلس النواب، بسبب جواب وزير العدل عبد اللطيف وهبي على برلمانية من البي جي دي، فاش قاليهم بلي نتي مقارياش ودايرا بيان مجلس الثورة وماشي كتهضري بلغة القانون.
برلمانية البي جي دي كانت قالت بلي قانون العدول لي جاب وهبي فيه ضرب للدستور واقصاء للذكاترة واقصاء للمرأة العدول.
كلام وهبي معجبش البي جي دي، وطلبو من رئيس الجلسة يسحب كلام وهبي من المحضر، لكن رئيس الجلسة الاتحادي ادريس الشطيبي، متفق مع وهبي وقال بأن كلام الوزير أقوله كذلك خاص البرلمانيين يقراو القانون ويعرفو ليه.
كلام الشطيبي زاد غضب نواب البي جي دي لي زاد شددو بلي جواب وهبي مافيهش احترام للبرلمانيين، وكلام غير مسؤول. لكن وهبي جوابهم بلي المداخلات لي دارو راه بيانات سياسية وبيان لمجلس قيادة الثورة.
رئيس الجلسة بدوره وصف مداخلات البي جي دي بالفوضى، وبغا يطرد البرلماني عبد الصمد حيكر من الجلسة بحيث طلب من الأعوان يخرجوه.
رئيس الجلسة قال بلي نواب البي جي دي كيديرو الفوضى وماركسيين على سنة الله ورسوله.
مور هاد الكلام ترونات وتقطع البث المباشر.. ناضت خلافات كبيرة قبل ما يتكالماو فالكواليس.