وكالات//

راجل تركي ف عمرو خمسين عام انتحر، بعدما العروسة ديال ولدُو الجزائرية هربات بالفلوس والذهب لي عطاوها باش توافق على داك الزواج.

الواقعة كانت فـ محافظة “تشاناك كالي” فشمال غرب تركيا، ملي لقات عائلة “غوموش سوي” ربّ الدار، رمضان، مشنوق فدارو نهار الأحد لي فات، بعدما كان داخل فواحد الحالة ديال الاكتئاب والحزن لأيام.

وحسب جريدة صباح التركية، الأب كان خلّص مؤخراً 500 ألف ليرة تركية (حوالي 12 ألف دولار) باش يقنع واحد الشابة الجزائرية توافق تتزوج بولدو “معمر” لي كيعاني من مرض نفسي.

وجات العروسة لتركيا فإطار الاتفاق لي داروه وسطاء، حيث هاد النوع ديال الزواج من بنات خارج تركيا منتشر فداك المنطقة. ودارت ليهم العائلة العرس نهار 27 أكتوبر لي فات، من بعد ما شراو ليها الذهب وحوايج الزواج.

ولكن الشابة الجزائرية اختفت من شي سيمانة تقريبا، ولقات عائلة الراجل أنها هربات بالفلوس والذهب، وأنهم على ما يبان طّاحو فنّصابة.