وكالات//

واحد الفيديو اللي تشهر بزاف فالشينوا دار ضجة كبيرة، بعدما بان فيه عدد من الزوار فحديقة حيوانات فمقاطعة لياونينغ (فالشمال الشرقي ديال البلاد)، وهما كينتفو الشعر من نمر ناعس، فتصرف وصفوه الناس بـ”مؤذي وماشي مسؤول”.

الواقعة وقعات فـ8 يونيو، فواحد المنطقة مخصصة للمشاهدة، فين كيكونو النمور كيرتاحو فوق نفق فولاذي كيدوزو منو الزوار. الفيديو بانت فيه مرا كتقول للناس باش يشدو أكثر من شعر النمر، على أساس أنه كيجلب الحظ وكيطرد الأرواح الخايبة، وهو معتقد معروف فبعض التقاليد الشعبية الصينية.

ومن بعد، بداو ناس آخرين يشاركو فهاد الفعل، كاين اللي شد خصلة من شعر النمر وربطها فشنطتو، وكاين راجل بان فالصورة كيتصور مع الشعر وكيقول عليه “أحسن تذكار – وفابور”.

الموظفين ديال الحديقة صرحو لوسائل الإعلام المحلية أنهم حاولو بزاف يمنعو الزوار يمسو بالحيوانات، ولكن ماقدروش يسيطرو عليهم، وقالو أن هاد التصرفات خرقو كبير لقوانين السلامة، وقدرو يسببو ضرر نفسي وحتى جسدي للنمور.