كود -ال بايس//

تعرض تران عاود تاني فإسبانيا لحادث خطير ليلة الثلاثاء فـ منطقة ڤيليدا نواحي برشلونة، بعدما طاح حيط  فوقو وهو دايز، الشي اللي خلّى على الأقل 15 واحد مبليسي، حسب أول حصيلة ديال السلطات، البلان وقع بين ستاسيون سان سادورني دانونيا وڤيليدا، وتدخلات فرق الإسعاف والحماية المدنية بالخف، ومشا 15 لواحد ليرجونص.

حسب الفرضيات اللولة، السبب الرئيسي باش طاح الحيط هو الشتا اللي كانت مجهدة فكاتالونيا هاد ليام، واللي رشات السور حتى راب، من بعد لي وقع حبس خط R4 ديال رودالييس مؤقتاً، وهاد الشي خلّى الروينة فحركة النقل، خصوصاً وأن الحادث جا فنهار عرفات فيه المنطقة جو مقلب.

فنفس الليلة وقع بلان آخر فـ خط R1 بين بلانس وماسانيت فخيرونا، مني خرج تران على السكة بسبب حجار كبار طاحو فوق الخط بسباب نفس العاصفة، ولكن ما كانوش إصابات، وحتى هو وقف مؤقتاً.

السلطات المحلية وفرق السكك الحديدية مازالين كيديرو التحقيق باش يعرفو المسؤوليات ويتأكدو من سلامة البنية التحتية، خصوصاً فهاد الظروف الجوية الصعيبة، قبل ما يرجعو الخدمة بشكل عادي.