كود – وكالات//

مسح الرئيس الأمريكي دونالد ترامب تصويرة نشرها على حسابو كانت كتجسدو بحال يسوع المسيح وهو كيداوي واحد المريض.

هاد التصويرة دارت الروينة وسط الأنصار ديالو المحافظين والمسيحيين فـأمريكا، اللي شافو فيها “تجديف‘‘.

فالتصويرة، بان ترامب خارج من يدو الضو وكيحطها على مريض بحال إلى كيعالجو، وحاطين معاه فالكادر طيارات حربية وعسكر، والنسر الأمريكي وتمثال الحرية .

ترامب خرج كيبرّر، وقال للصحافة فالبيت الأبيض:

“أنا نشرتها، وكان يحساب لي كتبيني بحال طبيب، وعندها علاقة بالصليب الأحمر‘‘.

وزاد قال بلي غير “الأخبار كذوب” هي اللي قالت باللي هو كيشبّه راسو بالمسيح.

وختم كلامو بهاد العبارة:“أنا فعلاً كنعالج المرضى!‘‘.