كود – وكالات //

خرجات تقارير كتقول ان لاعبات من المنتخب الإيراني لكرة القدم النسوية محضيات وسط لوطيل ديالهم، باش يتجبرو يرجعو لبلادهم مورا ما تسالي المشاركة فالبطولة الآسيوية ،القضية سخنات بعدما تدخل الرئيس الأمريكي دونالد ترامب وانتقد السلطات الأسترالية، واعتبر أن إجبار اللاعبات على الرجوع لإيران “خطأ إنساني فادح”.

ترامب دعا رئيس الوزراء الأسترالي باش يعطي اللجوء للاعبات الإيرانيات، واكد أن مريكان مستعدة تستقبلهم فحالة ما قرراتش أستراليا تدير هاد الخطوة ، هاد التصريحات جاو بعدما تقارير إعلامية قالت بلي اللاعبات محاصرات وسط لوطيل ، ومحضيات من طرف مرافقين عندهم صلة بـالحرس الثوري الإيراني، اللي كتعتبرو أستراليا منظمة إرهابية.

وحسب شبكة التحرير الألمانية (RND)، التلفونات ديال اللاعبات واتصالاتهم مراقَبة، وحتى الخروج ديالهم من الشومبرات محضي، الناشطة الحقوقية Minu Ghamari،  قالت فتصريح لقناة ABC إن اللاعبات معزولات تقريباً على العالم الخارجي، وما كاين حتى حد يقدر يتواصل معهم بحرية، وطلبت السلطات الأسترالية تسمح على الأقل بالهضرة مع اللاعبات بشكل فردي باش يكون عندهم الاختيار يطلبو اللجوء إلا بغاو.

رضا بهلوي قال أن خمسة لاعبات من المنتخب الإيراني النسوي هربو من معسكر الفريق وطلبو اللجوء السياسي فـ أستراليا، اللاعبات كانو تعرضو  لانتقادات من وسائل إعلام رسمية  فإيران بعد ما بقاو ساكتات مني تغنا النشيد الوطني قبل ماتش  ضد كوريا الجنوبية  فمنافسات كأس آسيا للسيدات، هاد الخطوة اللي اعتبرها بزاف ديال المراقبين احتجاج بسكات.