كود -وكالات //

واشنطن رجعات كتهدد طهران،  وقالت بلّي إلا بدات إيران كتعدم المتظاهرين اللي تشدّو فالاحتجاجات ما غا تلوم غا راسها، دونالد ترامب شدد فتصريح ديالو على أن بلادو ما غاديش تبقى ساكتة إلا سالات الأمور بالإعدامات، واعتبر أن هاد الشي خط أحمر.

من جهتها، إيران ما سكتاتش و خرجات كترد على التهديدات الأميركية، وقالت بلّي هاد الكلام ما هو غير “سبة” كتقلب عليها واشنطن باش تبرر تدخل عسكري ،طهران كتتهم الولايات المتحدة بأنها كتستغل ملف حقوق الإنسان باش تضغط سياسياً وتدير مشاكل فالمنطقة.

وبنفس النبرة  ترامب خرج بكلام آخر  وقال بلّي الولايات المتحدة محتاجة غرينلاند لأسباب ديال الأمن القومي، وزاد بلّي حلف الناتو خاصو يعاونا   باش تولي غرينلاند تحت السيطرة الأميركية، واعتبر أن إلا ما خداتهاش واشنطن، غادي تمشي لروسيا ولا الصين، وهاد الشي “ممقبولش” بالنسبة ليه.

ترامب زاد وقال بلّي ايلا كانت  غرينلاند تحت يد الولايات المتحدة غادي يقوّا الناتو ويكون  أكثر فعالية، وختم بالقول إن أي حل ما فيهش سيطرة أميركية على غرينلاند ما غاديش يقبل به.