كود -وكالات //

هدد الرئيس الأمريكي دونالد ترامب، اليوم السبت،  باللي إلى نفذات طهران أي محاولة باش تغتالو، فالرد الأمريكي غادي يكون مدمر.

وكتب ترامب فـمنصة “تروث سوشال” : “كاينين 1000 صاروخ واجدين وموجهين لإيران، وغادي يتبعوهم آلاف الصواريخ الآخرين مباشرة إلى نفذات الحكومة الإيرانية التهديد ديالها باغتيالي أو حتى محاولة اغتيالي.”

وزاد أكد باللي سبق ليه عطى أوامر مفتوحة للجيش الأمريكي، وقال: “الأوامر راه خرجات بالفعل، والجيش الأمريكي واجد وكامل الاستعداد، ولمدة عام كامل قابلة للتمديد، باش يقضي على جميع المناطق فإيران ويدمرها كاملة إذا وقع هاد الشي.”

وقبل هاد التصريحات، كان ترامب نفى نهار الجمعة وجود مخطط إيراني جديد لاغتيالو، ولكن شدد أن إيران كتعتبرو هدف من سنوات، وحذر بأن أي محاولة لاستهدافه غادي تكون عندها “عواقب خطيرة بزاف”.

وكانت صحيفة نيويورك بوست نقلات على ترامب أنه قال: “خليت تعليمات باش يتم قصف إيران باللي ما عمرها تشافت، إلى نجحو يغتالوني.”

وهاد التصعيد جا من بعد ما كشفات مصادر استخباراتية لشبكة CNN أن إسرائيل بلغات الإدارة الأمريكية بمعلومات على مخطط إيراني جديد لاستهداف ترامب، غير هو واشنطن قللات من أهمية هاد المعطيات، واعتبرات أنها ممكن تكون محاولة من إسرائيل باش تضغط على مريكان وتخليها دير  ضربات إضافية ضد إيران.