كود – فرانس 24  //

من بعد يام قليلة على ما شدّات القوات الأمريكية ناقلة نفط حدّا السواحل ديال فنزويلا، علن الرئيس الأمريكي دونالد ترامب على فرض حصار بحري من كل جوايه على ناقلات النفط لي  كيخرجو  او يدخلو لفنزويلا، هاد القرار زاد شغل العافية  فحملة الضغط على كراكاس،  واشنطن باقا كتقوّي الحضور العسكري ديالها فبحر الكاريبي، وترامب كيتّهم الرئيس الفنزويلي نيكولاس مادورو بلي كيسير شبكة ديال التهريب، اما فنزويلا كترد وكتقول بلي مريكان  باغية تغيّر النظام وتسيطر على النفط ديال البلاد.

نهار الثلاثاء، كتب ترامب فـالمنصة ديالو “تروث سوشيال” بلي عطى أمر بفرض “حصار كامل ، شامل” على جميع ناقلات النفط لي داخلين فالعقوبات  وقال بلي الأسطول البحري الأمريكي الكبير لي متمركز فالكاريبي “غادي يزيد  يكبر ” حتى تراجع فنزويلا، على  “كل النفط والأراضي والممتلكات الأخرى لي تسرقات من قبل”.

ترامب شدّد  بلي “نظام مادورو لي ما شرعيش” كيعتمد على نفط الحقول لي سماهم “مسروقين” باش يموّل راسو ويموّل أنشطة ديال تهريب المخدرات، والاتجار فالبشر، والقتل، والاختطاف.

من جهتها، الحكومة الفنزويلية وصفات إعلان ترامب بلي “ما معقولش” و”تهديد خطير”. وجا فبلاغ رسمي بلي رئيس الولايات المتحدة كيحاول يفرض حصار عسكري بحري  على فنزويلا بطريقة ما فيها لا عقل لا منطق، والهدف هو يسرق الثروات لي كترجع للشعب الفنزويلي.

،الولايات المتحدة  رسلات قواتها فبحر الكاريبي، و نشرات أكبر حاملة طائرات فالعالم وعدد من القطع الحربية، وزيد عليهم طيارات عسكرية أمريكية لي دارت طلعات فوق السواحل الفنزويلية فالأسبوعات لي دازو.