كود – وكالات //

ما قداتو فرحة الرئيس الأميركي دونالد ترامب، مني زعيمة المعارضة الفنزويلية ماريا كورينا ماتشادو، عطاتو البارح الخميس، ميدالية جائزة نوبل للسلام مللي تلقاو فالبيت الأبيض.

وكتب ترامب فالحساب ديالو فشبكة “تروث سوشيال”:

“ماريا عطّاتني جائزة نوبل للسلام بسباب الخدمة اللي درت، شحال زوين هاد الخطوة لي دارت وهاد الاحترام المتبادل بيناتنا، شكراً ليكِ يا ماريا”. ترامب معروف عليه أنه كان باغي ياخد هاد الجائزة من شحال هادي .

كانت ماريا كورينا ماتشادو علنات قبل من هاد الشي بساعات أنها “عرضات” ميدالية نوبل ديالها على الرئيس الأميركي، ولكن مركز نوبل للسلام، اللي كاين فأوسلو، خرج فبيان ووضّح أن الفائزين بجائزة نوبل عندهم الحق يتصرفو فالميدالية الذهبية كيف ما بغّاو، ولكن لقب “ديال نوبل” ما كينتاقلش وما كيتعطاش لواحد  آخر.

اللقاء بين ترامب وماتشادو، قدمو الجانب الأميركي على أنه لقاء مجاملة أكثر من كونو اجتماع سياسي رسمي.

وخا ترامب فرح بها، كان صرّح من قبل أن ماريا كورينا ماتشادو ما مأهّلاش دابا باش تحكم فنزويلا، وفضّل فهاد المرحلة أنه يتم تسيير البلاد بقرارات مباشرة من واشنطن، من بعد اعتقال الرئيس السابق نيكولاس مادورو.