كود – وكالات //

الرئيس الأمريكي دونالد ترامب دار  أطول خطاب فتاريخ الكونغريس مني هضر فيه على شنو  تبدّل مني رجع للحكم، و قال باللي مريكان ولات “كبر وأقوى ولاباس عليها  كثر من قبل”، وبقى كيدافع على السياسة ديالو فالاقتصاد والتجارة.

فعلاقتو بالخارج وجّه ترامب هضرة قاصحة لـ إيران، وقال باللي مازالين كيقلبو يطوّرو صواريخ وقدرات نووية تقدر توصل حتى امريكان، و أكد باللي  كيفضّل الحل بالدبلوماسية، ولكن اكد بلي عمرو ما غادي يخلي إيران يكون عندها سلاح نووي، وزاد هضر على الضربات الجوية لي دارتها  مريكان  ضد القدرات النووية ديال طهران، وهضر حتى على العملية اللي قال طيّحات بالرئيس الفنزويلي نيكولاس مادورو.

ترامب دافع على الحملة ضد الهجرة وعلى الرسوم الجمركية، حتى من بعدما المحكمة العليا الأمريكية حبسات بعض القرارات ديالو، وقال باللي غادي يلقى طرق خرين باش يفرض ضرائب على السلع اللي داخلة من برا، وكيأكد باللي هاد الرسوم فمصلحة البلاد، اما المنتقدين كيقولوا المواطن هو اللي كيخلص الثمن.

الجو فالقاعة كان مشحون، الديمقراطيين قاطعوه وصفروا عليه، وحتى النايب آل غرين خرجوه من الجلسة من بعدما رفع لافتة احتجاجية ، اوا ما بين شي كيصفق و شي كيصفر مزال باين بلي السياسة فمريكان باقية مقسومة على جوج.