كود سبور//

اعلن وزير الرياضة الإيراني احمد دنيا مالي، ان بلادو ما غاديش تشارك فكاس العالم 2026، المقامة فالميريكان وكندا والمكسيك الصيف الجاي.

ونشرت وكالة “رويترز” تصريحات لوزير الرياضة الإيراني، قال فيها: “حيث النظام الميريكاني اغتال زعيمنا، ما يمكنش لينا تحت اي ظروف نشاركو فكاس العالم”.

وكمل وزير الرياضة الايراني: “ولادنا ماشي فأمان، والظروف ماشي مهيأة دابا باش نشاركو”.

وزاد الوزير الإيراني وقال: “دارو أعمال خبيثة ضد ايران، وفرضوا علينا 2 حروب فثمانية او تسعة اشهر، وقتلو الآلاف من ولاد شعبنا، راه ما يمكنش لينا نشاركو”.

وكاتجي تصريحات وزير الرياضة الإيراني، بعد إعلان السويسري جياني انفانتينو رئيس الاتحاد الدولي لكرة القدم، ان الرئيس الميريكان دونالد ترامب قاليه: “مرحبا بإيران يجيو يشاركو فكاس العالم فالميريكان”.

وطيحت القرعة إيران فالمجموعة السابعة من كاس العالم 2026، مع بلجيكا ومصر ونيوزيلندا، وغادي تلعب الماتشات ديالها فالگروبات فالميريكان، 2 فلوس انجليس، وواحدة فسياتل.