كود – وكالات//

بعد ما علن ترامب على عملية فنزويلا، قال باللي القوات الأمريكية شدّات الرئيس نيكولاس مادورو حي هو ومراتو وخرّجوهم من البلاد، ترامب وصف العملية بأنها ناجحة ومخطط لها مزيان، والهدف الأساسي منها هو حماية الأمن القومي الأمريكي ومحاربة تجارة المخدرات الدولية.

ترامب صرح لشبكة فوكس نيوز باللي تفرج فعملية اعتقال مادورو مباشرةً بحال إلا كيتفرج على شي برنامج فتلفزة، وقال باللي العملية كانت سريعة ومصروعة وكل خطوة محسوبة، وأكد باللي العكسر لي دارو العملية ما كاينش لي يقدر يدير بحالهم بنفس الكفاءة.

ترامب زاد قال إن العملية دازت بلا ما يموت حتى شي عسكري أمريكي، وكان ضروري نصبرو 4 أيام بسبب الجو المخربق، ترامب قال مادورو ومرتو تنقلو برا البلاد، ومن المتوقع يوصلو من بعد لنيويورك، ترامب شدد باللي القوات الأمريكية الخاصة قادرة دير مهام معقدة وخطيرة بطريقة مغيزة.

ترامب زاد باللي واشنطن ممكن تدخل فقطاع النفط الفنزويلي بعد ما خرج مادورو، ووضح باللي هاد الموارد مهمة باش يتعاود ترتيب الاقتصاد الفنزويلي ويتدعم الاستقرار فالمنطقة، ترامب ربط العملية بمحاربة المخدرات وقال باللي ملايين الأمريكيين كيموتو كل عام بسبب التهريب.

بالنسبة للمستقبل ديال فنزويلا، ترامب قال باللي مريكان غادي تبقى قوية ومؤثرة فالمرحلة الانتقالية للقيادة السياسية والاقتصادية، وغادي يراقبو المعارضة باش يسيرو البلاد ويضمنو أنّ الموارد المهمة تحت عينين واشنطن مباشرة، باش يبقى الاستقرار وما يرجعش نظام بحال مادورو.