كود -وكالات//

قال اليوم الرئيس الأمريكي دونالد ترامب باللي ولي العهد السعودي محمد بن سلمان تملق ليه، قبل مايعاود يشكرو ويقول عليه “راجل زوين”.

ترامب مني كيشرح العلاقة الحالية بين واشنطن والرياض ، قال باللي الحاكم الفعلي ديال السعودية، الأمير محمد بن سلمان، “was kissing my ass اللي ترجمتها الحرفية هي : كيبوس مؤخرتي” ومعنها الحقيقي هو ان ولي الهد السعودي كان كيتملق ليه .

https://x.com/i/status/2037789972384915470

هاد الخطاب لي جا فمؤتمر “مبادرة الاستثمار فالمستقبل” ففلوريدا،  كيعاود فيه ترامب على واحد الحوار لي قال دارو مع الزعيم السعودي على كيفاش أمريكا رجعات قوية فالعهد ديالو، وقال باللي محمد بن سلمان ما كانش متوقع هاد الرجوع القوي.

وقال ترامب:”ما كانش كيظن هاد الشي غادي يوقع… ما كانش كيظن غادي يحتاج يتملق لي… كان حاسبني غير رئيس مريكاني فاشل بحال الآخرين… ولكن دابا خاصو يكون مزيان معايا”.

وخا هكاك، رجع ترامب ومدح ولي العهد، وقال عليه “محارب”، وأن السعودية خاصها تكون فخورة بالقيادة ديالو.

هاد التصريحات جات فوسط الحرب العسكرية اللي دايرة بين أمريكا وإسرائيل ضد إيران، واللي بدلات بزاف ديال التوازنات فالمنطقة.

وحسب تقرير ديال نيويورك تايمز، محمد بن سلمان كيدير محادثات سرية مع ترامب وكيشجعو يكمل الحرب، وكيشوفها “فرصة تاريخية” باش يضعفو إيران، وقال التقرير حتى باللي كاين ضغط باش يتضربو منشآت الطاقة ديال إيران.

ولكن فالمقابل، السعودية نفات رسمياً هاد الشي، وقالت باللي كتشجع الحل السلمي وكتعطي الأولوية للدفاع على راسها من الهجمات الإيرانية.

ترامب  قال باللي دول الخليج بحال السعودية وقطر والإمارات واقفين مع مريكان فهاد الصراع، كثر من بعض حلفاء الناتو.

محللين ومسؤولين حذرو من المخاطر، حيث الحرب إلا طولات ممكن تعرض السعودية لهجمات إيرانية بلا قياس ، خصوصاً فالبنية التحتية ديال النفط، وتقدر تأثر حتى على الاستقرار الاقتصادي.