كود – وكالات //

قررات مريكان تنقص 5000 عسكري من قواتها فلالمان، هاد القرار جا من بعد الصداع لي بين الرئيس الأمريكي دونالد ترامب والمستشار الألماني فريدريش ميرز بسبب الحرب مع إيران.

القرار جا من بعد نهار واحد فقط من الانتقادات اللي وجهها ترامب لميرز، اللي قال باللي مريكان  تعرضات لـ”إهانة” من طرف المفاوضين الإيرانيين ،ترامب من جهتو هاجم ميرز فالسوشيال ميديا وقال عليه ما كيديرش خدمتو مزيان وعندو مشاكل كثيرة، بحال الهجرة والطاقة، وحتى لمح  باش يسحب القوات الأمريكية من طاليان وصبليون.

حالياً عند مريكان حضور عسكري كبير فـألمانيا، فيه كثر من 36 ألف جندي مفرقين على شلا قواعد ،وزارة الدفاع المريكانية قالت بللي هاد القرار ديال الانسحاب غادي يتم تدريجياً ف12 لشهر.

ترامب كان ديما كينتقد حلف الناتو والدول الحليفة، حيث كيشوف أنهم ما كيعاونوش خصوصا  فملف مضيق هرمز،من جهتو ميرز قال باللي مريكان ما عندهاش استراتيجية واضحة فهاد الحرب، واعتبر أن الإيرانيين أذكياء فالتفاوض وكيخليو المريكانيين ميدو منهم والو، هاد التصريحات خلات ترامب يرد عليه بقوة ويتهمو حتى بأنه مع فكرة امتلاك إيران لسلاح نووي.

ألمانيا حالياً كتعتبر أكبر قاعدة للقوات الأمريكية فأوروبا، وحتى قاعدة رامشتاين الجوية كتعتبر من أهم النقاط العسكرية. وقبل هاد القرار، حاول ترامب ينقص القوات فـ2020 ولكن الكونغرس رفض، ومن بعد جا جو بايدن ولغى الفكرة.

من ناحية أخرى، ألمانيا ولات كتصرف بزاف على الدفاع، وغادي توصل حتى لـ3.1% من الناتج الداخلي، بعدما كانت كتتعرض لانتقادات بسبب ضعف الإنفاق العسكري.

هاد التحركات كاملين كيبانو أنهم جزء من خطة أكبر ديال مريكان باش تحول تركيزها العسكري من أوروبا لمنطقة المحيطين الهندي والهادئ، وهاد الشي خلق قلق عند بعض الدول الأوروبية خاصة اللي قريبة من روسيا.