وكالات//

حسب تقرير ديال شبكة ESPN، الرئيس الميريكاني دونالد ترامب كيتمنى يكون اسمو هو اللي غادي يتعطى للملعب الجديد ديال فريق واشنطن كوماندرز، من بعد ما حضر مؤخراً لماتش ديال الفريق ضد ديترويت ليونز فـ الملعب الحالي ديالهم فـ ولاية ماريلاند.

هاد الأخبار جاو بعد أسابيع قليلة من موافقة مجلس العاصمة واشنطن على مشروع لهدم الملعب القديم روبرت إف. كينيدي وبناء ملعب عصري بلاصتو، على ضفة نهر أناكوستيا شرق المدينة.

الشبكة قالت باللي مصادر من البيت الأبيض أكدو أن ترامب عبّر على رغبته يشوف اسمو على الملعب الجديد، وصرّحات المتحدثة باسم البيت الأبيض كارولين ليفيت وقالت:

“غادي يكون اسم رائع بلا شك، حيت الرئيس ترامب هو اللي خلا مشروع إعادة بناء الملعب ممكن”.

ترامب كان تكلم قبل على هاد المشروع فـ يوليوز اللي فات، وقال بأنه كيدرس تفاصيل الصفقة، وزاد: “راه قطعة أرض مهمة، وغادي نعاونهم إلا قدرت”.

ومع ذلك، ترامب وضّح قبل بأن اللي كيهتم بيه أكثر ماشي اسم الملعب، ولكن اسم الفريق، حيث قال بأنه باغي يرجع الاسم القديم ريدسكينز (Redskins)، واعتبر تغييرو ’’غلطة ما كيشبها حتى حاجة‘‘.