كود – وكالات //
قال الرئيس دونالد ترامب الخميس أن إيران تدمرات عسكريا لدرجة أنها غادي تحتاج تقريباً لـ10 سنين باش تعاود تبني القدرات ديالها.
وفمقابلة مع شبكة ABC News، قال ترمب بلي تقريبا 58% من منصات إطلاق الصواريخ الإيرانية تدمّرات فالضربات الأخيرة، وگال بلي الدمار كان كبير بزاف، وهاد الشي غادي يخلي إيران تحتاج مدة طويلة باش ترجع تبني القوة العسكرية ديالها من جديد.
وبخصوص واش الضربات سالات ولا مازال، قال ترمب:
“كاينين بزاف ديال الناس كيقولو بلي الحرب سالات دابا، ولكن بالنسبة ليا مازال ما سالاش، غادي تسالي غير ملي أنا نقرر .
أما بالنسبة للزعيم الجاي ديال إيران، قال ترمب بلي واشنطن ما باغياش يتعيّن حتى شي واحد فهاد المنصب إلا إذا كان مقبول من طرفها وزاد قال: “ما بغيناش شي رئيس أمريكي من بعد 10 سنين يلقى راسو باقي واحل مع هاد المشكل وما عارفش كيفاش يتعامل معاه”.
ومني استقبل ترامب فريق ميامي ومعهم ميسي قال ’’غير نساليو مع إيران غادي تجي النوبة ديال كوبا غير مسألة ديال وقت وصافي‘‘قبل ما يزيد ويقول “راه قطعنا عليهم النفط، والفلوس، أو كاع لي كان كيجيهم من فنزويلا ودابا راه بغاو يديرو معانا الحل”.
أما مجلس النواب الأمريكي رفض طلب وقف الحرب الجوية اللي دارها ترامب على إيران، وجات نتيجة التصويت 219 صوتا مقابل 212 فمجلس النواب لي كيسيطر فيه الجمهوريون بأغلبية قليلة.