كود – أزيلال //

استقبل البارح بالليل  المركز الصحي القروي بأنركي  اقليم أزيلال واحد المريض كانت حالتو خطيرة بزاف، كيعاني من تعفن فلبطن ناتج على مضاعفات ديال قرحة فالمعدة ،تشخصات الحالة ديالو عن طريق التطبيب من بعيد، تحت إشراف طبيب مختص فالجهاز الهضمي بالمستشفى الإقليمي بأزيلال، وتفعل البروتوكول العلاجي المعمول به، قبل ما يتخذ قرار الإحالة الاستعجالية باش يدوز لعملية جراحية.

مشات سيارة إسعاف ومعاها الفرملي الرئيسي ديال المركز، اللي بقى كيتبع الحالة الصحية ديال المريض وسط الطريق ، فواحد الظروف صعيبة بزاف بسبب التدخلات الميدانية لفتح الطريق وتحيتد التلوج من طريق أنركي، تيلوكيت وواويزغت فالاتجاه ديال السبيطار  الإقليمي فأزيلال.

وصل المريض السبيطار  مع 11 ونص ديال الليل، من بعد رحلة دامت خمس سوايع ونص ، وتحت إشراف مدير المستشفى الإقليمي بأزيلال، دخل مباشرة لعملية جراحية مستعجلة دامت تقريبا أربع سوايع، دارها طاقم طبي وتمريضي وتقني متكامل، والحمد لله العملية دازت بنجاح. ودابا المريض باقي ناعس فالمستشفى الإقليمي بأزيلال، والحالة ديالو مستقرة وتحت المراقبة الطبية المستمرة.