عثمان الشرقي ـ كود//

فخطوة إنسانية، المدير ديال الأكاديمية الجهوية للتربية والتكوين بجهة فاس مكناس تدخل باش يلقى لكوثر ابعلال سكن خاص فالثانوية التقنية اللي حدا كلية الطب ففاس، وبهاذ المبادرة وضع حد لمعاناتها الاجتماعية اللي كانت قريبة تهدد مستقبلها الدراسي.

كوثر أبعلال جابت معدل تقريبا 19.23 فالبكالوريا، وكانت الأولى فالتعليم العمومي على الصعيد الوطني. حلمها كان تلتحق بكلية الطب، ولكن البداية ديالها فالمسار الجامعي واجهت صعوبات كبيرة حيث ما لقاتش سكن قريب من الكلية بسبب الكراء الغالي اللي يفوت الإمكانيات ديال عائلتها، وهاد الظروف كانت قريبة تحرمها من بلاصتها فكلية الطب ففاس.

لكن التدخل ديال الإدارة الجهوية رجع ليها الأمل، حيث المدير ديال الأكاديمية قرر شخصيا يلقا ليها حل عاجل وعملي، بتخصيص سكن آمن ومناسب داخل مؤسسة تعليمية قريبة من كليتها.

كوثر عبّرت على الامتنان الكبير ديالها لهاد التدخل وقالت باللي غادي تكمل المسيرة ديالها بكل جدية باش تحقق الحلم ديالها وتولي طبيبة.