كود هناء ابو علي ///

تخيلو يجي صحافي فالاولى او “دوزيم” او “ميدي 1” او صحافي باذاعة عندها متابعين ويبدا هدرتو “ما غاديش نطول عليكم اليوم. جاني ميساج من خالد ايت الطالب وزير الصحة. قال لي “الميساج يكون فيه “لاباس. راني خايف بزاف. ممكن تتصل بي”. 
علاش كتبنا تخليو حقاش هاد الوزير من نهار بدا تدبير الجايحة ما عمر همو كان يهدر مع لمغاربة. كان عارف باللي ما كاين حتى حد يحاسبو. دار تدبير كارثي ومازال. مع بداية الموجة الثانية من “كورونا فيروس” رجع اللاور.

هاداك اللي قلت ليكم تخيلوه راه وقع بصاح ولكن ففرنسا. هاد الميساج توصل بيه يان بارتيز مقدم “لوكوتيديان” علي “تي ام سي” نهار 4 نونبر اي لاربعا اللي فاتت. توصل بيه من رئيس اللجنة الطبية لمستشفيات باريس ريمي سالومون. طلب يجي للبرنامج يدوز ميساج. جا وقال “انا خايف وخايف بزاف من الفيروس يزيد يتحرك اكثر من السابق”.  وبعد ما اكد ان “بنادم طلع ليه الدم من “الكوفيد”. عيى من الهدرة من كل نهار يسمع اراء الاطباء والخبراء واخبار بعضها متناقض. الناس باغية تعيش بشكل عادي. انا جيت هنا باش ندوز ميساج” اضاف ….” لقوادة الحقيقية هي اننا غاديين نديرو خيمات قدام الصبيطارات ونكونو مجبرين ونبداو نعزلو شكون يتعالج وشكون نخليوه يموت. هاد الشي غير مقبول” واكد باللي “باش نتفاداو الكارثة خاص من دابا نقصو بشكل كبير الكونطاكط باش توقفو دينامية الفيروس العنيفة. نحتارمو اكثر الحجر الصحي. 

دابا البارح فكازا تسجلات 1601 حالة جديدة ديال كورونا من اصل 5398 حالة فكاع المغرب. مات 16 بيضاوي من اصل 68 ماتو فبلادنا. الاعداد غادية وترتافع. وزير الصحة غادي وكيتخبى. كيتهرب. كيهرب من لمغاربة. من مواجهتهم. البرلمان ساكت. 
اكثر من هاد الشي الوزير منع بوقاحة حتى مسؤولي الصحة يخرجو للاعلام. عقلتو باش كان برنامج يعده رضوان الرمضاني على “ميد راديو” تفاهم مع من نبيلة الرميلي المديرة الجهوية للصحة بجهة الدار البيضاء وناض الوزير رفض يسمح ليها دوز فالبرنامج. تخاطب لمغاربة.

تصورو ماشي غير ما كيديرش خدمتو بل ما مخليش حتى ناس الصحة يتواصلو. يوعيو الناس

الوضع كارثي وغادي يتزاد ودابا اش نديرو مع هادا اللي ما عندو لا لون سياسي لا انتماء. يعني حتى حد ما يحاسبو. المحاسبة غادية تكون للعدالة والتنمية لبنعرفة. ياك هو اللي قال جبتو.