كود علي الصافي ////

بيان غريب كولو تخربيق دارتو النقابة الوطنية للصحافة المغربية. گاليك “حرمان زميلات وزملاء في القطب العمومي (الشركة الوطنية/ دوزيم/ميدي 1/وكالة المغرب العربي للأنباء) من بطاقة القطار المجانية لسنة 2025”

غادي نردو على كل نقطة نقطة. قبل نقدمو ليكم اللي جا فيه. قاليك يا سيدي هاد الصحافيين من المؤسسات المذكورة “ظلوا يستفيدون منها اي البطاقة ديال تران٬ لسنوات” وباللي هاد الشي “توجه يضيق الخناق على المهنيين، ويضرب المكتسبات، ويشرع بمزاج انتقائي لا سند له في هذه الظرفية”.

اولا: دابا ديك الاتفاقية المنظمة للحصول علي مجانية التنقل عبر التران راه اتفاقية توقعات بين الوزارة الوصية على القطاع=الاتصال وبين جمعية مهنية لناشري الصحف الورقية والالكترونية٬ ثم راه فاجتماع مجلس ادارة القطب العمومي قال رئيسو فيصل لعرايشي باللي كاع المؤسسات اللي تابعة ليه كتاخد بريم على التنقل. علاش النقابة سكتات على صحافيين كياخدو منحة من ادارتهم على التنقل وهاد التنقل كيديروه فابور ببطاقة القطار المجانية.

هاديك الديباجة البكائية ديال “بلاغ بشأن حرمان زميلات وزملاء من بطاقة القطار المجانية” وباللي “فوجئ الزميلات والزملاء في القطب العمومي (الشركة الوطنية/ دوزيم/ميدي 1/وكالة المغرب العربي للأنباء)، بحرمانهم من بطاقة القطار المجانية لسنة 2025 ” راها كلشي الا دقيقة. هاداك المال اللي كيتعطى باش الصحافيين كيحصلو على بطاقة القطار المجانية راه مال عام موجه بوضوح ل”الصحافة المكتوبة والالكترونية” وكان فالسنوات السابقة فغير محلو بل تبديد للمال العام

لو كانت عند النقابة الجرأة كون مشات عند الوكيل العام فالرباط ويفتح تحقيق باش هادوك الصحافيين ديال الاذاعات الوطنية والقنوات يرجعو لفلوس للي خداوها. راه كان خرق للقانون.

ثم نقطة اخيرة: واش هادوك عدد البطاقات ديال مجانية القطار تلاحو؟ اللا. راهم غاديين يتوزعو على الصحافيين والصحافيات فالصحافة المكتوبة والرقمية. كيفاش مؤسسات كانت تاخد جوج بطاقات واذاعة وتلفزة كياخدو صحافييها بريم التنقل٬ يستافدو منو. هادي تخربيقة كبيرة دارتها النقابة. حشومة على النقابيين اللي فالصحف الورقية والرقمية يشوفو هاد الشوهة ويوافقو عليها.

راه حشومة يقولو “كان قرار الحصول على عدد محدود من بطاقة القطار لفائدة صحافيات وصحافيين بالقطب العمومي مرتبط بتخفيف عبء مادي كبير على صحافيات وصحافيين يضطرون للسفر اليومي بين مدن القنيطرة والدار البيضاء في اتجاه الرباط أو العكس، وهو عبء محصور على هذه العينة دون باقي العاملين بهذا القطاع والقاطنين بالعاصمة الرباط، خصوصا”. راه فلوس الدولة كتمشي لغير ناسها. كيفاش هاد النقابة كتقصي صحافيين من الصحف المكتوبة والالكترونية وباغية تعطيه لصحافيي الاذاعات والتلفزيون اللي عندهم اصلا بريم

اللي عندو خطاب غامض هو بيان النقابة. كيف قلنا ليها تمشي عند الوكيل العام عوض نديرو “أشكال نضالية سيحدد لها التوقيت والشكل لاحقا”