كود الناظور///

عاشت عائلة كتسكن فاقليم الناظور، وتحديدا فدوار ݣارمة، بجماعة أولاد داوود زخانين، قصة رعب، بسبب حرائق كتنوض فدار بلا ما يعرفوا السبب.

وحسب أفراد العائلة، أكدوا بأنهم من نهار جابوا واحد السيد كيدعي أنه كيدير الرقية الشرعية، بغرض علاج بنتهم، بدات بزاف دلأمور كتوقع فدار، من بينها أنهم كيلقاو الحجر والنار كتشعل بوحدها.

وزادوا قالوا بلي الأمور تطورات، بحيث تحرقات الدار كلها، الشي لي خلاهم يخويو دارهم، خوفا من وقوع كارثة.

هاد الواقعة تفاعلات معها ساكنة الإقليم، بحيث عبروا بزاف منهم على غرابة الواقعة، وقالوا بلي الأمر كلو مدبر، بحيث ميمكنش هادشي كلو يديرو الجن.

من جهة أخرى، كاين لي كياكدو على أن بحال هاد الوقائع، كتكون بفعل فاعل، ماكاين لا عمل السحر لا الشعوذة، باش يوقعوا بحال هاد الظواهر.

جدير بالذكر أن منطقة الريف خصوصا، عرفت فالشهور الأخيرة، مجموعة من الوقائع المشابهة، بحيث أكد مهتمون، بان قلة الشي وايمان الناس بالتخاريف، خلاو بزاف دناس يلتاجأو للسحر والشعوذة باش يحققوا الرغبات ديالهم.