كود – كازا //

فإطار اتفاق حكومي فإكستريمادورا بين حزب الشعب وفوكس، تطرحات فكرة سميتها “الأولوية الوطنية” اللي كتقول خاص الإسبان يكون عندهم الأسبقية فالسكن المدعوم على حساب المهاجرين، سواء فالشرا ولا الكرا مع شروط بحال الإقامة 10 سنين للشراء و5 سنين للكراء وربط المستفيدين بالإقليم اقتصادياً واجتماعيا، هاد القرار دار صداع كبير فإسبانيا، حيث سانشيز اعتبرو تمييز وكيخلق مواطنين بدرجات مختلفة وهدد بالطعن فيه، فحين فوكس كيشوفو تطبيق لشعار “الإسبان أولاً”، وحتى بعض قيادات حزب الشعب عبرات على الشكوك ديالها على  قانونيته.

فهاد السياق نقلات ݣود تحقيق ميداني دارتو صحيفة إل موندو الإسبانية بتاريخ 25 أبريل 2026، على القلق والغضب اللي كيعيشوه المغاربة فمنطقة إكستريمادورا مورا الاتفاق الحكومي لخر بين حزب الشعب وحزب فوكس، اللي كيرسي “الأولوية الوطنية” فتوزيع المساعدات والسكن العام.

الصحيفة مشات لمدينة تالايويلا فإقليم كاسيريس، لي كيشكّل فيه المهاجرين ربع السكان، وهي أعلى نسبة في الإقليم كامل.

تلاقات الصحيفة بعدد من المغاربة لي ساكنين فتالايويلا هادي سنين طويلة، ولي من بينهم بوزيان لمقدم، لي فعمرو 34 عامًا، واللي جا على 9 سنين، واليوم عندو بيرو كيعاون فيه المهاجرين باش يريݣلو وراقهم، قال بوزيان للصحيفة بلي كيستوفي جميع شروط “الأولوية الوطنية كأي مواطن آخر”، وانه كيحس بالإنتماء لتالايويلا وخا محاولات بعض الأحزاب باش تبعدو.

فالسياق نفسو وجّه بوزيان تحذير للسياسيين الإسبان، مني قال: إلا ما بغاوش المغاربة يبقاو هنا، يقدرو يمشيو لمناطق أخرى كتفتح ليهم الباب، وزاد : إلا قرروا جميع المهاجرين  يوقفو الخدمة نهار واحد، يقدرو يشلّو البلاد كاملة من الفلاحة حتى السياحة والخدمات، وكيأكد أن المهاجر ما كيسرقش لخدمة ديال شي حد، ولكن كياخد غير الخدمة اللي الإسبان نفسهم كيرفضوها، وهادا هو الفرق الأساسي.

حمزة ريجم، شاب مغربي عندو 26 عام، متزوج بإسبانية سميتها إيستيفانيا كوريياس من نفس مدينة تالايويلا، وعندهم دري صغير، قال لجريدة إيل موندو وهو جالس فمحل حلاقة ديال مغربي كيحلق لولدو مني سولاتو الصحيفة على موضوع الأولوية الوطنية “راسهم كيبغي يتفرݣع ملي كيشوفو أن إسبانية أصيلة تزوجات بمغربي.”

وكشفات الجريدة الإسبانية قصة صوفيا طباوي، مغربية عندها محل وسط تالايويلا مع راجلها شحال من عام، وكيخدمو ثلاثة ديال الناس، صوفيا وضحات أن راجلها عايش فإسبانيا كثر من 15 عام، وحتى هي عندها إقامة دايمة، وعندهم جوج دراري كيقراو فهاد المدينة، وعبّرات على رفضها للصورة اللي كيروجو لها بعض الأحزاب، وأكدات أنها عمرها ما استفدات من أي دعم حكومي.

وزادت الجريدة بينات أن الاتفاق بين حزب الشعب وفوكس ما بقاش غير فموضوع السكن، ولكن وصل حتى لقرار إلغاء تدريس اللغة العربية فمدارس إكستريمادورا، وان وهاد القرار جا بعد شهور قليلة من توقيع اتفاقية تعليمية رسمية بين مدريد والرباط لي تنُشر فالجريدة الرسمية فدجنبر 2025.

ونقلات “إل موندو” حتى شهادة شاب مغربي اسمو محمد عبد السميع، عندو 21 عام، وصل لتالايويلا بعد رحلة طويلة دازت من تركيا حتى وصل لإسبانيا، ملي تسوّل واش كيتلقى مساعدات، جاوب بإسبانية ضعيفة: “والو، زيرو”. وقال أن غير الهدف ديالو هو يعيش حياة أحسن من اللي كان عايشها فبلادو.

وعلى المستوى السياسي، رئيس الحكومة الإسبانية بيدرو سانشيز علن أن الحكومة غادي تطعن قضائياً فهاد الاتفاق إلا تبين أنه ماشي قانوني، واعتبر أن مفهوم “الأولوية الوطنية” كيعني خلق مواطنين من درجات مختلفة. فالمقابل،قاد حزب فوكس دافعو على  شعار “الإسبان أولاً”.

وختمات الجريدة تحقيقها بشهادة فوزية بلاردي، مغربية عايشة فإسبانيا من الصغر وعندها الجنسية الإسبانية، ومزوجة بإسباني وعندهم 4 ديال دم راري. وقالت “عمري ما خديت حتى مساعدة، حياتي كاملة خدامة… الخدمة هي أولويتي الوطنية كل نهار”. وهي جملة لخصات، حسب الجريدة، واقع آلاف المغاربة اللي بنو حياتهم فإكستريمادورا ورافضين يتعاملو كمواطنين من الدرجة الثانية.