وكالات//

قاضي فـ لوس أنجلوس فرض على مغني الراب كانيي ويست يحضر شخصيًا باش يشهد فـ قضية رفعها عليه واحد الموظف اللي كان خدام فـ أكاديمية دوندا، وعطاه مهلة ديال 30 يوم باش يجاوب على الأسئلة تحت القسم، من بعد ما كان كيتأخر بزاف فـ الإجراءات.

هاد الدعوى ترفعات من طرف تريفور فيليبس فـ أبريل 2024، واتّهم فيها كانييه ويست بسلوك خايب وخطير داخل المدرسة. وكيقول فيليبس أنه شاف ويست كيهضر مع الموظفين بكلام فيه كراهية لليهود، ومرّة هضر قدّامهم على حلق رؤوس التلاميذ وبغا يدير سجن داخل المؤسسة.

وزاد كيقول إن ويست كان ديما كينتقد الموظفين السود، وهو واحد منهم، والدعوى فيها حتى اتهامات بالتحرش، التمييز، وخلق جو خايب فالخدمة، وكيطالب بتعويض على هاد الشي كامل.

وبحسب موقع TMZ، فيليبس حاول بزاف يجبر ويست باش يشهد، ولكن ماكانش كيستجب، وهاد القرار ديال القاضي جا باش يجبرو ويحيد عليه التّماطل، وهادي غتكون أول مرة غيواجهو فيها ويست وجها لوجه فـ المحكمة من نهار ترفعت القضية.

الصحافة حاولات تتواصل مع المحامي ديال ويست، إدواردو مارتوريل، ولكن ما بغاش يعلّق.