عفراء علوي محمدي- كود//

مع ارتفاع الإصابات بفيروس كورونا المستجد فكازا، كان إلزامي على وزارة الصحة تلجأ للقطاع الخاص، وتكلف مختبرات كثيرة بليتيست، وكلينيكات باستقبال المرضى، لكن هذشي خداوه بعض المراكز الاستثفائية فالقطاع الخاص بمنطق “الهمزة”، بحيث بمجرد ما يجي عندهم مصاب بالفيروس يلزمو عليه ثمن خيالي من الدخلة، كيتحدد فملايين السنتيمات، واخا تكون الحالة ديالو طفيفة.

“كود”، تواصلات مع مجموعة من الكلينيكات عبر الهاتف، وثبت ليها بأنه كاينين فعلا اللي كيطلب بين 4 حتى ل6 دالمليون فقط باش ينعس المصاب بفيروس كورونا، فالوقت اللي الوكالة الوطنية للتأمين الصحي “لانام”، حددات الأثمن ديال العلاج، بناء على الحالة دالمريض، وواش يكفيه البروتوكول العلاجي المعمول به، أو خاصو يتوضع للعناية فالإنعاش أو التنفس الاصطناعي، وكل حاجة دارت ليها الثمن ديالها.

وفنفس الإطار، راسل المكتب الجهوي لصيادلة الجنوب طالب وزير الصحة، خالد آيت الطالب، مؤخرا، باش يفتح تحقيق فهذشي، وحتى فالجودة ديال الخدمات ديال هذ المصحات، بعدما توفى عضو فالمكتب نفسو، كان مريض بكوفيد، وكان كيتعالج فواحد الكلينيك، ومات غير بعد سيمانة من العلاج ديالو فيه.

وقال المكتب الجهوي أن هذ المصحة طلبات من عائلة الفارماسيان 14 لمليون، عطاتهم منها 4 مليون كتسبيق، ومنين توفى السيد مابغاوش يعطيوه ليهم حتى يكملو ليهم 10 دالمليون اللي بقات، اللي كانو اتفقو عليها من اللول.

فتواصل “كود” مع نبيلة الرميلي، المديرة الجهوية للصحة فجهة كازا سطات، باش تستفسرها على هذ المصحات اللي كيطلبو الملاين، قالت أن هذشي ماشي معقول وماشي قانوني، بحيث أن “لانام” حددات الأثمنة ديال كل حاجة متعلقة بالعلاج، وحسب كل فرد والحالة ديالو، وكتبقى هذ الأثمنة فيكس، ومايمكنش تجاوزها

وزادت الرميلي أن المواطنين فحالة ما تعرضو بعض المواطنين للنصب، وخلصو أثمنة مرتفعة، أو تطلب منهم هذشي لاستقبالهم، فما عليهم غير يتقدمو بشكاية لدى المصالح المختصة.

وحسب قائمة الأسعار ديالها، اللي اطلعات عليها “كود”، “لانام” حددات الأثمن حسب حالة المرضى، ثمن التشخيص، والإيكوكَرافي، وثمن الأدوية اللي غيخصهم ياخدو، وحتى الثمن ديال دخول الإنعاش، وهو اللي كيبقى مرتفع نوعا ما (1500 درهم لليوم الواحد)، بالإضافة لثمن التقرير البيولوجي اللي كيدار بالنسبة للحالات الحرجة قبل من العلاج (2750 درهم)، بينما الحالات العادية والطفيفة فكيمكن تستفد من العلاج بثمن معقول.

وقالت الرميلي أنه ماشي جميع الكلينيكات فكازا مصرح ليها باش تعالج مرضى كوفيد، بل كاين تقريبا عشرة ديال الكلينيكات اللي تعاقدو مع الوزارة لهذ الغرض، واللي تعطى ليهم الترخيس بعدما تمت معاينة طاقتهم الاستعابية، والتجهيزات اللي كيتوفرو عليها، وواش كاينة إمكانية يديرو سيركوي خاص بالمصابين بالفيروس، مع احترام شروك الوقاية والسلامة الصحية لتجنب انتقال العدوى.

وبالنسبة للتحاليل، فكتقول الرميلي أنه تحدد الثمن ديالها فالمختبرات الخاصة بين 750 حتى ل800 درهم، “وكيبلغ العدد ديالها 24 مختبر فالمجموع، واللي بفضلها قدرنا نطلعو عدد التحاليل فكازا بوحدها ل9000 تحليلة فاليوم”، على حد قولها.