عن الوكالات ///

بدأ رئيس الجزائر عبد العزيز تبون زيارة رسمية لروسيا. هاد الزيارة فيها 3 ايام. الرئاسة الجزائرية قالت انها تهدف الى “تعزيز التعاون بين البلدين الصديقين”. صحف جزائرية هدرات على ان هاد الزيارة غادية تطرق ل”الشراكة الاستراتيجية والقضايا الدولية” سواء فالشرق الاوسط او منطقة الساحل وباللي التعاون فالطاقة داخل “اوبك” غادي يكون فجدول الاعمال.

غدا لخميس غادي يتلاقى بوتين وتبون. رئيس الوزراء الروسي قال باللي غادي يتم توقيع إعلان الشراكة الاستراتيجية الشاملة” وباللي غادية تكون بمثابة انتقال التعاون الروسي الجزائري إلى مستوى نوعي جديد.

وهدر على ان المهم هو تكون “مقاربات روسيا والجزائر في الأجندة الدولية متقاربة أو متطابقة”.

روسيا محتاجة اللي يدعمها فحربها ضد اوكرانيا او على الاقل يكون محايد. الجزائر غادية تقبل ولكن بشرط دعم روسيا للجزائر باش تنضم لتكتل دول “بريكس” الاقتصادية، التي تتزعمها كل من روسيا والصين.

رئيس الجزائر كان قال باللي بلادو باغية تنضم لهاد التكتل وباللي علاقة بلادو مع الصين وروسيا يخليها تكون فهاد التجمع اللي غادي يساعدها اقتصاديا وسياسيا. دابا الجزائر مازال بعيدة على هاد التجمع. الدخول ليه مشروط بتحقيق نسبة نمو اقتصادي فايتة 5 بالمائة ويكون ناتجها المحلي فايت 200 مليار دولار

هاد الزيارة رسالة كذلك لفرانسا. تبون كان معروض لباريس ولكن تأجلات الزيارة وهدرو على منتصف يونيو اللي هو غدا وتأجلات. الاليزي ما علنش على تاريخ ليها. دابا كيهدرو علي شتنبر او اكتوبر