مصطفى الشاذلي كود سبور//

وقعت احداث شغب بين جمهور الوداد الرياضي وجمهور الجيش الملكي، ملي سالا ماتش الكلاسيكو بين الفريقين يوم السبت 3 ماي 2025، فستاد دونور برسم الدورة 28 من البطولة الاحترافية.

وبعدما سالا الماتش بين الفريقين بنتيجة 2 لواحد لمصلحة الوداد الرياضي ضد الجيش الملكي، كان الشارع اللي قدام ستاد دونور مسرح لاشتباك بين مشجعين وداديين ومشجعين عسكريين، وبداو كايتشايرو بالحجر والقراعي، قبل ما يتدخل الامن ويفكهم.

وبالرجوع للماتش، فالمباراة بين الفريقين عرفت كثرة الكلاشات بين جماهير الوداد الرياضي وجماهير الجيش الملكي، وجمهور الوداد كان كايطلع ميساج من هنا وجمهور ليفار كان كايرد عليه من الهيه، قبل ما تقلب سبان ومعيور بين الجمهورين، وهذا الشي راه هو اللي خلى الصداع ينوض فالزنقة بين مشجعي الفريقين مباشرة ملي سالا الماتش.

طبعا اي شخص دار الشغب وشارك فيه فهو كايتحمل المسؤولية ديال هذه الاعمال الجرمية اللي كايعاقب عليها القانون من خلال الفصل 507 المثير للجدل، ولكن السؤال اللي كايتطرح هو واش معقول يتحلو بيبان التيران لجمهوري الفريقين بجوج فوقت متقارب باش يخرجو بحالهم ؟ مع العلم ان السلطات ديما كاتخرج جمهور الفريق المضيف يمشي بحالو، عاد كاتخرج جمهور الفريق الضيف باش يشد الطريق لمدينتو، وعلاش فهذا الماتش تحلو بيبان التيران لجمهوري الفريقين فوقت واحد تقريبا وما كانش فارق كبير بين وقت السماح بخروج جمهور الوداد وخروج جمهور ليفار، وهنا السؤال واش الجمهور بوحدو كايتحمل المسؤولية ديال هذا الشي ؟ ولا حتى الجهات المنظمة والسلطات كاتحمل المسؤولية؟

وكايجي هذا الحادث، مباشرة بعدما تم السماح بتنقل الجمهور بين المدن، حيث عدد من الماتشات مدة هادي كايتمنع فيها تنقل جمهور الفريق الضيف، بالإضافة إلى اقامة المناظرة الجهوية للتشجيع الرياضية بعدد من المدن اللي باغيين من خلالها يلقاو حلول لمشاكل الجمهور فالتيرانات ومن بينها الشغب، ولكن كايبان ان مازال خاص الخدمة فهاد الجانب مع جميع المتداخلين، جمهور وسلطات ومسؤولين الكورة والأندية، باش يتلقا حل جدري لمشاكل الشغب فالتيرانات وكل واحد يتحمل مسؤوليتو.