كود -وكالات //

حققات النجمة الأمريكية إنجاز كبير فالمسيرة ديالها، من بعدما ولات أصغر مرا كتدخل لقاعة مشاهير كُتّاب الأغاني على 36 عام. هاد التكريم جا من بعد 20 عام على أول أغنية ديالها “تيم ماكغرو” فـ2006، وهو الشرط باش أي فنان يقدر يترشح لهاد اللقب.

تايلور سويفت قدرات فهاد السنين تبني اسم كبير فعالم الموسيقى، مني خرجات 12 ألبوم وحققات نجاحات عالمية كبيرة. كما فازت بـ14 جائزة غرامي، وسجلات رقم قياسي مني ربحات 4 المرات بجائزة أحسن ألبوم فالعام.

فحفل التكريم اللي تدار فمدينة نيويورك، قال المخرج العالمي ستيفن سبيلبرغ كلمة فحق سويفت وقدرتها على التأثير فالجمهور، ومن جهتها عبرات الفنانة على الامتنان ديالها الكبير لعائلتها اللي عاوناتها من اللول، وقالت باللي النجاح ديالها ما كانش غادي يتحقق بلا التضحيات اللي داروها والديها.

وكيجي هاد التتويج التاريخي فأسبوع ميز بالنسبة لتايلور سويفت، اللي مازال كتواصل تحطم الأرقام وتأكد المكانة ديالها كواحدة من أبرز كاتبات الأغاني فالعالم.