كود الرباط//

تزامنا مع الهضرة على اسعار الخبز والمضاربة بالبلاغات بين الهيئات المهنية حول الزيادات فثمنو، رجعات “كود” لتاريخ الخبز فالمغرب، لقينا فأواخر 1947 كان اجتماع المجلس الوزاري، فاش كان احمد عصمان مؤسس التجمع الوطني للأحرار رئيسا للحكومة، دار مرسوم باش يحددو اسماء وطريقة صناعة الخبز.

وبعد دراسة مشروع مرسوم تحديد كيفيات صنع الخبز وبيعه فداك الاجتماع، خرج المرسوم فـ15 يناير 1975 باش يتم تطبيقو، فيه تحديد اسماء الخبز والوزن ديالو، وكاين نوع باريزيان عطاوه سمية “القضيب”.

القضيب هو نوع من الخبز كيتسما المزمار الصغير، وتم تعريفو وفق المرسوم بـ”الخبز المصنوع من الدقيق الوطني المستخرج من القمح الطري، فيه هاد النوع البالغ وزنه 250 غراما المتسامح في وزنه بنسبة 5 في المائة”.

وكاين النوع ديال الخبز من وزن 800 غرام، وسماه مرسوم عصمان بـ”بوردولى” البالغ طوله نحو 50 سنتيمترا المتسامح في وزنه بنسبة 5 في المائة.

المغاربة كيستهلكو بزاف ديال الخبز، وكاينين دراسات كتقول بلي المغاربة كيلوح يوميا 30 خبزو فالزبل أو للأعلاف. الارقام كتقول بلي المغرب كينتج تقريبا بين 110 و120 مليون خبزة يوميا. الفائدة والو. رغم ذلك ثمن الخبز العادي بقا درهم وعشرين سنتيم، أكثر من 20 عام هادي.