الرئيسية > آش واقع > تاجيل محاكمة عمر الراضي للجمعة
13/07/2021 20:11 آش واقع

تاجيل محاكمة عمر الراضي للجمعة

تاجيل محاكمة عمر الراضي للجمعة

عفراء علوي محمدي- كود//

أجلات غرفة الجنايات الابتدائية بمحكمة الاستئناف فكازا، اليوم الثلاثاء 13 يوليوز، جلسة محاكمة الصحافي المعتقل عمر الراضي، وزميلو عماد استيتو، حتى للجمعة 16 يوليوز 2021.

فالغالب غيكون النطق بالحكم فالجلسة الجاية، بحيث بقاو مرافعتين لمحامين فالملف، بينما عقبات النيابة العامة وترافعو باقي عناصر دفاع الطرفين.

وحسب مصدر “كود”، فاليوم الثلاثاء، طلب دفاع المشتكية بالراضي، حفصة بوطاهر، باش تستمر الجلسة فالسرية، كيف تم فالجلسة السابقة فاش كانت المواجهة بين الاطراف، وواخا هذ الطلب رفضاتو النيابة العام، إلا ان المحكمة وافقات عليه، باش ياخد الدفاع راحتو فالترافع، والحديث على أمور حميمية.

فالوقت نفسو، انتفضو دفاع الراضي لرفض هذ القرار، وشافو ان استمرار باقي الجلسات وراء ابواب مغلقة كيتعارض مع مقتضيات المحاكمة العادلة، خصوصا وان المتهم كياكد على براءتو فهذ الملف.

وطالبات بوطاهر، من خلال دفاعها، بتعويض قدرو مليون درهم على الضرر اللي لحق بيها، بينما تشبت دفاع المتهم ببراءتو، وبان العلاقة اللي كانت بينهما علاقة رضائية، وبأن الملف سياسي.

ومتابع الراضي بجانايتي هتك العرض بالعنف والاغتصاب، وجنحتي تلقي أموال من جهات أجنبية بغاية المس بسلامة الدولة الداخلية، ومباشرة اتصالات مع عملاء دولة أجنبية بغاية الإضرار بالوضع الديبلوماسي للمغرب.

موضوعات أخرى