كود سبور//

معولين نهضة بركان ممثل المغرب فكأس الكونفدرالية الإفريقية، يرجعو بالتأهل للفينال من الجزائري، اليوم الاحد ملي غايلعبو فروتور الدومي فينال ضد شباب قسنطينة الجزائري.

مهمة نهضة بركان فالتأهل لدومي فينال كأس الكونفدرالية الإفريقية، كاتبان ساهلة فالجزائر ومريحة حيث الفريق المغربي كان ربح شباب قسنطينة فماتش الذهاب فبركان بنتيجة 4 لزيرو الاحد الماضي، ولكن خاص ضروري الاحتياط سوى تقنيا من الفريق المنافس، او حتى من شي حاجة خارجة على الكورة، خصوصا وأن السلطات الجزائرية ديما كاتحاول تستغل الماتشات المغربية-الجزائرية لخلق التوتر، وأقرب دليل هو دومي فينال النسخة الماضية بين نهضة بركان واتحاد العاصمة، وقصة الخريطة المغربية فالتوني اللي دارت عقدة السلطات الجزائرية، ورباح نهضة بركان الذهاب والإياب بقوة القانون، وإقصاء الفريق الجزائري.

وهذه المرة فريق جزائري تاني فطريقو للخسارة أمام نهضة بركان المغربي، وبعدما خسرو اتحاد العاصمة بالقانون أمام الفريق المغربي، هذه المرة شباب قسنطينية حتى هنا فطريقهم للإقصاء قدام نفس الفريق المغربي، الرباح الكبير البركانيين فماتش الذهاب بنتيجة 4 لزيرو، والفريق الجزائري خاصاه شبه معجزة إلى بغا يتأهل حيث خاصو يربح بنتيجة 5 لزيرو باش يتأهل، وهذا الشي راه صعيب ضد فريق متمرس بحال نهضة بركان وعندو لاعبين بخبرة ومدرب مزيان وبتجربة كبيرة، وهذا الشي كايرجح كفة الفريق البركاني باش يرجع بالتأهل من الجزائر فالماتش اللي غايلعبو ضد شباب قسنطينة اليوم الاحد مع 5 العشية.