كود سبور//

كيزيد يتأكد مع الوقت أن الإنجاز اللي كتحققو الكورة المغربية على مستوى جميع الفئات ما جاش من الصدفة، وبلي وراه خدمة ديال جميع مكونات الجامعة الملكية المغربية لكرة القدم، فجميع الفئات السنية ديال المنتخبات الوطنية، واللي ما غافلين على حتى حاجة بما في ذلك الجانب ديال الإعداد الذهني لللاعبين.

وتحدث الدكتور مجيد بروزيين المعد الذهني ديال المنتخب الوطني المغربي لأقل من 17 عام المشارك فمونديالU17، وكشف قبل ماتش ثمن النهائي أمام منتخب إيران، كيفاش كيتم إعداد اللاعبين ذهنيا، وقال فتصريح للموقع الرسمي للجامعة الملكية المغربية لكرة القدم: “كنلاحظو تطور مهم فالسنوات الأخيرة فيما يخص الإعداد الذهني داخل المنتخبات الوطنية وكمثال المنتخب الوطني لأقل من 17 عام، اللي دابا سنة ونصف وحنا كنخدمو مجموعين، وجاتنا الفرص نخدمو مع هاد الوليدات ودرنا منافسات على الصعيد الإفريقي والعربي ودابا فكأس العالم”.

وزاد وضح المعد الذهبي ديال الأشبال: “سمحت لنا هذه المدة باش نعرفو الميزات الشخصية لكل لاعب وكندخلو بشكل فردي او جماعي وكنعرفو أن هذا الشي مهم فهاد المنافسات اللي كيكون فيها ضغط كبير وكيخص تحكم فالحالة الذهبية والنفسية ديال اللاعبين داكشي علاش كنخدمو معهم بشكل فردي او جماعي، وفالكروب كنخدمو معهم على مستوى التحفيز والأهداف اللي كنسطروها خلال هذه المدة ديال كأس العالم، وفرديا كنخدمو بمشاورة مع الناخب الوطني وكندخلو فنهاية الحصص التدريبة حيث اللاعبين بعد المباريات وبعد التمارين كيكونو فحالة فيزيولوجية مرتفعة وكنحاولو نديرو لهم حصص ديال الاسترخاء وكنحاولو نرجعوهم دغيا للحالة الطبيعية باش يستافدو ما بين الماتشات”.

وأكد مجيد بروزيين: “اللاعبين فهمو شنو هو الإعداد الذهني ولاش كيصلاح وفين كيكون وانسجمو مع هذا النوع من الاستعداد، وكنحاولو نربيو الاستقلالية عند اللاعب بهذا الشي حيث ما يمكنش لينا ندخلو معه للتيران باش نقولو له كيفاش خاصو يفكر وشنو خاصو يدير ويعرف كيفاش يتحكم فالحالة الذهنية ديالو فالماتشت المهمين كيعرف كيفاش يسلك راسو”.