كود سبور//

تأكد الخبر اللي نشرات جريدة “كود” هادي يومين عن غياب الدولي المغربي يحيى عطية الله لاعب الوداد الرياضي على الفريق فالديربي ضد الرجاء الرياضي غدا الاربعاء، ضمن الدورة 14 من البطولة الاحترافية حيث دخل رسميا المعسكر ديال المنتخب المغربي غير هاد الصباح د اليوم الثلاثاء.

ووصل يحيى عطية الله قبل لحظات لمركز محمد السادس لكرة القدم فالمعمورة، باش يدخل المعسكر الإعدادي ديال المنتخب الوطني المغربي، تحت إشراف الناخب الوطني وليد الركراكي تحضيرا لكأس إفريقيا فالكوت ديفوار، وهي البطولة اللي غتكون بين 13 يناير و11 فبراير 2024، وراه تأكد بهذا غياب عطية الله على الوداد غدا فالديربي.

للإشارة فاللاعبين د المنتخب الوطني المغربي بداو كيوصلو صباح اليوم الثلاثاء إلى مركز محمد السادس بالمعمورة، والى جانب عطية الله وصل هاد الصباح كل من أيوب الكعبي، بلال الخنوس، رومان سايس، المهدي بنعبيد، ومحمد الشيبي.