كود كازا ///
تأجلات اليوم جلسة محاكمة محمد بودريقة البرلماني التجمعي ورئيس الرجاء البيضاوي السابق إلى الثلاثاء المقبل 1 يوليوز 2025.
وتم تأجيل الجلسة لي كانت أطوارها فالمحكمة الزجرية عين السبع بكازا، من أجل “إتمام المرافعة وتعقيب النيابة العامة”. بعدها غادي يكون النطق بالحكم فقضية “غريبة”.
ف جلسة اليوم واصل دفاع بودريقة القاضي السابق نور الدين الرياحي التركيز على صور ديال بودريقة باش يبعد عليه تهمة النصب والتزوير، بحيث جبد مجموعة ديال الصور ، من بينها صورة ليه مع ماكرون، وعلق عليها الرياحي بالقول بللي الأجهزة الفرنسية المخابراتية ما يمكنش تسمح لأي واحد باش يتصور مع الرئيس ماكرون.
وقدم المحامي كذالك في مرافعتو صور ديال بودريقة مع أمراء وشيوخ من دول الخليج،وأخرى مع رئيس الحكومة الحالي عزيز أخنوش… وهاذ الشي كولو باش يبعد على الموكل ديالو تهمة النصب.
من جهتها قالت العائلة، لـ”كود” باللي قضية الشيكات كلها محسومة. وأكدات باللي عندهم گاع التنازلات، بل حتى ديك ديال التزوير عند القضاء ما يفيد باللي ما كاينش.
دابا الثلاث الجاي نشوفو إتمام الرياحي لمرافعتو وبعدها تعقيب النيابة العامة وممكن النطق بالحكم.
