كود سبور//

تأجل الجمع العام الانتخابي لعصبة فاس-مكناس، اللي كان منتظر يتعقد اليوم الجمعة ورا الجمع العام العادي، ويسفر على انتخاب رئيس جديد، (تأجل) إلى وقت لاحق، بسبب الاحتجاجات على التقارير المالية وتبادل الاتهامات بين مكتب الرئيس الحالي محمد جليلي والمعارضين له، وكانت الاجواء مرونة بزاف وفوضوية.

وقال محمد جليلي رئيس عصبة فاس-مكناس واللي مقدم لائحة للترشح للحفاظ على الرئاسة (قال) في تصريح للصحافة على هامش الجمع العام: “كنا كانتمناو هذا الجمع العام يكمل في عرس رياضي ولكن زاغ عن المسار ديالو والأخلاق ديالو، حنا ما كناش باغيين الامور توصل لهذا الشي وجينا من أجل الديمقراطية، الجمع العام سيد نفسه الناس من البداية وهي كاتعرقل ما عرفناش علاش، راه الكورة ماشي هاكدا كاتمشي، إلى كاين طعون كاتدار هاد الطعون عن طريق القانون، اللي بغا يطعن فالتقرير المالي من حقو يطعن فيه ومن حقو يطعن فالتقرير الأدبي هذا حق مشروع، كنا باغيين نديرو اليوم عرس رياضي ولكن دخلو وسطنا واحد المجموعة اللي بعاد كل البعد على كرة القدم، واللي بغاو يشوهو كرة القدم فالجهة بعاد، حنا عازمين باش نرجعو للجمع العام وتكون حاضرة الجامعة الملكية المغربية لكرة القدم، وغايكون التسيير بحزم من اجل انتخاب الرئيس المقبل، العام العادي انتهى بالمصادقة على التقرير المالي والادبي ودابا غنمرو للجمع العام الانتخابي اللي غانقرروه في اقرب وقت اللي ما خاصوش يتعطل”.

أما علي ودغيري أبو القاسم عضو بلائحة عبد السلام بوعاز، وهي اللائحة المنافسة، قال في تصريح للصحافة: “كان غايكون هذا الجمع العام عرس ولكن للأسف الخروقات بدات من الاول، اولاً الجموع العام ديال 4 سنوات غتدار في تقرير واحد، وثانيا طريقة الدعوة إلى الجمع العام فيها خروقات، وثالثا عدم التوصل بالتقارير بـ10 أيام من قبل، باش على الاقل تكون عندنا فكرة على شنو دار فالمصاريف، وبصراحة ملي حضرنا اليوم للجمع العام تصدمت ماشي حتى تفاجأت، لا بالطريقة اللي تقدم بها التقرير المالي ولا التقرير الأدبي ديال العصبة ديال مدة 4 سنين، والغريب ان التقارير ما فيهاش الختم ديال امين المال ولا ديال الكاتب العام ولا ديال الرئيس، والقانون كايقول انه خاص خبير في المحاسبات اللي كايشرف على العملية وكايدير فيها المصادقة ديالو على الحسابات، هذاك الشي كثير بزاف وبغاونا بطريقة عشوائية نصادقه على التقرير وما يمكنش لنا نصادقو عليه حيث غانكونو كانكذبو على الناس، وكنا باغيين هذا الشي يكمل وجهة فاس-مكناس تعاني رياضيا وكرويا، جينا بواحد التصور جديد كاينين شباب اللي باغيين يخدمو، ولكن للأسف الجمع العام ما كملش لأنه الخروقات اللي كاينة ما خلاتناش نكملو، وممثلي الجامعة الملكية المغربية لكرة القدم خداو الطعون”.