اسماء غربي- كود//

مصادر من “ميدي 1 تي في” اكدات لـ”كود” ان بيير كازالطا، مات اليوم الإثنين 6 دجنبر، كان فعمرو 85 عام، وهو مؤسس إذاعة البحر الأبيض المتوسط الدولية “ميدي1″، وقناة “ميدي1سات”، قبل ما تولي “ميدي1 تي في”.

بيير كزالطا بقى المدير ديال “ميدي 1″، وهو اللي اسسها ف 12 يوليوز 1980، برأسمال مجموعات خاصة مغربية وشركاء فرنسيين، حتى عين المجلس الإداري للشركة حسن خيار رئيسا مديرا عاما لـ”ميدي”، خلفا لكازالطا ف2010.

ولأسباب مكانش كشف عليها، بيير كازالطا ف2009 بدا يفكر يغادر المحطة الإذاعية، اللي كدوز أخبار وبرامج بالعربية والفرنسية، وحققت نسبة مرتفعة من الاستماع فالمغرب و فالمغرب العربي

بيير كازالطا هو فرنسي من كورسيكا، تزاد فيها ف 28 يونيو عام 1936، وكاع الناس اللي عرفوه واللي خدمو معاه او كانو قراب منو، كيقولو عليه انه كان شخص ذكي، وعندو شخصية قوية وكيخدم بتفاني ومكانش كيعقل على الغشاشة فخدمتهم…