بيضاوية كاعية – كود //

التبعكيك والبخ فاغبي صورو. كيدوز ف”دوزيم” “انا بيضاوي” غدا الاحد الحلقة الثالثة. الاحد اللي بعدو اخر حلقة. فيها تاريخ لمدينة وحاضرها وجغرافيتها. مدينة مفتوحة متفتحة. ظاهريا مهرجان “دجازا بلانكا” خاصو يكون انعكاس ليها. واخا منقول ككونسيبت ولكن بحال كاع اللي كيدار فكازا كيتطبع بطباع لمدينة وسكانها.

انا كازاوية مسكونة بالمدينة. عاشقة للحياة اذن للفن. قلبت على تيكي ل”ميكا”. بصراحة ماشي فنان عزيز علي ولكن قلت نفرح اولادي فاخر الموسم الدراسي. عيطت على “انفولاين” ديال المهرجان باش نشوف ديسبونيبيليتي لحضور الكونسير.

سيدة “انفولاين” عطاتني تلفون شي حد قالت عليه المدير التجاري. اييه. مدير متكبر. فيه بزاف الحقارة وقليل من التواضع. من هاد المدير يبان عربون المهرجان.
سولتو بادب واخا لا يستحقو. اش عندكم من عرض باش نشري التذاكر.
بوقاحة رد علي باللي ما بقى الا حاجة وحدة. طابلة فيها 9 الاشخاص ل3 ايام المهرجان ب15 مليون. اييه 150 الف درهم يا الناس.

هاد الغبي وناس هاد المهرجان ما بقاوش كيفرقو بين طابلة فكاباري ومهرجان فمدينة
كيفاش حدث اسمو مهرجان توصل بيه الوقاحة يطلب 15 مليون. كيفاش مهرجان كيجي ويزيد يعمق بين مغربين
كيفاش عطات لمدينة الترخيص لمهرجان لموسيقى جات اصلا ضد الاقصاء والتهميش
علاش هاد الاغبياء كيهينو المغربي باش يطلبو 15 مليون.

اش من ضرائب كيخلصو. الكاباري ايلى خلصتي راه كاين الضرائب اما هادو راهم كيديرو بيزنس غطاؤو الثقافة. اجرام فحق الثقافة واجرام فحق كازا واجرام فحق المغرب.

كيفاش تسمح مدينة كازا فهاد الاجرام. فلوس كلها تخرج للخارج وتهميش كلي للفنان المغربي.

بغاو مهرجان يقودو خارج كازا وما دخلش لمدينة ولا الامن ولا اي مؤسسة منتخبة او رسمية فأي شكل من اشكال التنظيم او الامن وديك الساعة يديرو ما بغاو.

هاد المهرجان خاص مفتشي المالية يجيو يقرقبو عليهم. شكون فالدولة عطاهم يبيعو ويشريو فالطابلات. فالطاسة. فالماكلة. ما عمرنا شفنا شي مهرجان مغربي عندو هاد الرخص. ماليه ملايرية كيجيو ليه لملايرية خاص على الاقل 60 بالمائة من مداخيلو يمشيو للضرائب.

لمدينة خاصها دير انشطة. هادو اللي ولاو كيبيعو ويشريو فكلشي راهم بوحدهم والدولة مهربة من مسؤوليتها. بقاو حتى شي نهار يهجمو مغاربة على نشاط بحال هادا ويولي الطايح كثر من الهارب وتوقع الكارثة. باراكا من هاد اللعب.